Европа Украинага ҳарбий кўмак кўрсатишда давом этар экан, ихтилофни дипломатик йўл билан ҳал этиш учун саъй-ҳаракатлардан ҳам тўхтамайди. Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррель Euronews телеканалига берган интервьюсида таъкидлашича, бу икки ёндашув бир-бирига зид эмас, балки бир-бирини тўлдиради.

«Айни пайтда барча воситаларни ишга солган ҳолда, алалхусус, БМТ орқали тинчлик борасидаги музокараларни ўтказишга ҳаракат қилмоқдамиз. Аммо тинчлик (келишуви) Украинанинг ҳудудий яхлитлигига ҳурмат ва БМТ уставига риоя этишга асосланиши керак. Келгуси ҳафта Нью-Йоркдаги учрашувлар бунинг учун муносиб имконият туғдириши мумкин», – дейди у.

Ж.Боррель Россия президенти Владимир Путиннинг музокараларга розилик бериши имконини баҳолар экан, урушни бошлаган ҳам, тўхтатадиган ҳам у эканини урғулаган.

ЕИ бош дипломати Россияга нисбатан жорий этилган санкциялар самарали таъсир кўрсатаётганига ҳам ишонч билдирган.

«Биз Россияга нисбатан жорий этган иқтисодий санкциялар унга кучли зиён келтирмоқда. Углеводородлар савдосидан даромад камайиб, бюджет ва савдо тақчиллиги ортмоқда. Автомобилсозлик, авиасаноат каби муҳим йўналишлар аллақачон тўхтаган. Санкциялар заҳарга ўхшайди: секин, аммо тайин таъсир этади», – дейди Ж.Боррель.

Сиёсатчи Россия урушни яна чўзмаслиги учун европаликлар ҳозирги руҳда саъй-ҳаракат қилиши муҳимлигини таъкидлаган.

Аввалроқ ЕИ бош дипломати Россияга нисбатан коллектив Ғарб жорий этган санкцияларнинг таъсир кўламини батафсил тушунтириб берган эди.

2022 йил 17 ноябрь куни Самарқандда бўлиб ўтган сиёсий машқаратда эса Ж.Боррель Украина босқинининг Марказий Осиёга таъсири ҳақида гапирган эди.