Ижтимоий тармоқларда Тошкент шаҳрининг Мирзо Улуғбек туманидаги Мустақиллик шоҳ кўчасида содир бўлган йўл-транспорт ҳодисаси ҳамда ушбу ҳолат юзасидан чиқарилган суд қарори кенг муҳокамаларга сабаб бўлмоқда.

Хусусан, тармоқ фойдаланувчилари томонидан “Lixiang L9” русумли автомашина юқори тезликда ҳаракатлангани, автоуловнинг жиддий шикастланиши ҳам айнан шу ҳолат билан боғлиқ экани ҳақидаги фикрлар илгари сурилмоқда. Шунингдек, суд қарорида тезлик 60 км/соат деб кўрсатилгани адолатли эканига шубҳа билдирилган.

Мазкур ҳолат юзасидан Тошкент шаҳар судлари муносабат билдирди.

Қайд этилишича, судга оид автотехника экспертизасида “Lixiang L9” русумли автомашинанинг ҳаракатланиш тезлигини аниқ белгилаш имконияти мавжуд бўлмаган. Шу билан бирга, экспертиза хулосаларига кўра, автомашина 60 км/соат тезликда ҳаракатланган тақдирда ҳам йўл-транспорт ҳодисасининг олдини олиш учун техник имконият мавжуд эмаслиги кўрсатилган.

Шунингдек, ижтимоий тармоқларда “Lixiang L9” бошқа автомашинани “ярмигача йўқ қилиб юборгани” ҳақидаги хабарлар ҳам ҳақиқага тўғри келмаслиги таъкидланади. Ҳодиса оқибатида жиддий зарар айнан “Lixiang L9” автомашинасининг ўзига етган.

Маълум қилинишича, ЙТҲ натижасида “Lixiang L9” ҳайдовчиси енгил тан жароҳати олган, бошқа жабрланувчилар ёки ҳалок бўлганлар ҳақида иш материалларида маълумот мавжуд эмас.

Суд томонидан йўл-транспорт ҳодисасига ҳаракатда бўлган “BYD Song Plus” автомашинаси ҳайдовчисининг ҳаракат йўналишини ўзгартиргани сабаб бўлган деб топилган. Натижада унга нисбатан маъмурий жазо тайинланиб, етказилган моддий зарарни қоплаш мажбурияти белгиланган.

Тошкент шаҳар судлари мазкур изоҳ ахборот характерига эга эканини, бу биринчи инстанция суди қарори бўйича умумий хулоса эмаслигини алоҳида таъкидлади.

Шу билан бирга, суд қароридан норози тараф қонунчиликда белгиланган тартибда юқори суд инстанциясига шикоят қилиш ҳуқуқига эга экани маълум қилинган.