Ижтимоий тармоқларда Тошкент шаҳрининг Учтепа туманидаги «Rayyan kids land» хусусий боғчасида болаларга нисбатан қўпол муносабат акс этган видеолар тарқалди. Видеоёзувларда болалардан бирининг оғзига мато тиқилгани, яна бошқасининг қўли эшик билан қисилгани, бир қўлидан тортиб, судралганини кўриш мумкин.

Мактабгача ва мактаб таълими вазирлигининг маълум қилишича, ҳолат назоратга олиниб, ҳуқуқ-тартибот органлари масъуллари таркибида ишчи гуруҳ тузилган. Вазирлик буйруғи билан нодавлат мактабгача таълим ташкилотининг лицензия талаблари ва шартларига риоя қилиниши юзасидан текширув ўтказилди.

Ўрганиш натижаларига кўра, таълим ташкилоти томонидан қонунчилик ҳужжатларида белгиланган 6 та ҳолат бўйича лицензия талаблари ва шартлари қўпол равишда бузилгани аниқланган.

Хусусан, жорий йилнинг 24 июн куни таълим ташкилоти тарбиячиси А. Г. томонидан тарбияланувчилардан бирига нисбатан жисмоний ва руҳий зўравонлик қилингани қайд этилган. Ҳолат бўйича тегишли ҳуқуқни муҳофаза қилувчи органлар томонидан Жиноят кодексининг 110-моддасига (қийнаш) асосан жиноят иши қўзғатилган.

Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонунига кўра, нодавлат таълим ташкилоти томонидан лицензия талаблари ва шартлари бир марта қўпол равишда бузилиб, мазкур қоидабузарлик фуқароларнинг ҳаёти ва соғлиғига зиён етказилишига олиб келган бўлса, бу лицензияни бекор қилиш учун асос ҳисобланади.

Шу сабабли Мактабгача ва мактаб таълими вазирлиги томонидан «Rayyan kids land» нодавлат таълим ташкилотига тегишли лицензияни бекор қилиш юзасидан Тошкент туманлараро иқтисодий судига ариза киритилиши маълум қилинди.