Бошқирдистоннинг Уфа шаҳрида Ўзбекистонда туғилган 24 ёшли фуқаро 15 йилга қамалди. Суд унга Нижегород микрорайонидаги қотиллик учун ҳукм чиқарган. Бу ҳақда «Уфа онлайн» хабар берди.

Маълум қилинишича, воқеа 2018 йил 20 январь куни содир бўлган. Судланувчи шериги билан бир кафени тунамоқчи бўлган. У олдин шу ерда ишлаган бўлиб, ичкарига қандай киришни билган.

Қўшни бино орқали кафега кираётганларида бир фуқаро кўриб қолган ва полиция чақиришини айтиб қўрқитган. 24 ёшли ўзбек унинг бўйнига пичоқ тортган. Жабрланувчи ҳодиса жойида жон таслим қилган.

Шундан кейин у кафега кириб, 38 минг рублга тенг миқдордаги қимматли буюмларни ўғирлаган. Судланувчи айбига тўла иқрор бўлган. Бошқирдистон суди унга қаттиқ тартибдаги ахлоқ тузатиш колониясида ўташ учун 15 йиллик қамоқ жазосини тайинлади.

Судда аниқланишича, судланувчи ҳалок бўлган фуқаронинг укасига 1 млн. рубль миқдорида товон пули ҳам тўлаган.

Жиноят фош этилишига шу атрофда бўлган таксичи сабаб бўлган. Қотилнинг жиноий шериги ҳақида маълумот берилмаган.