Бухоро вилояти, Қоракўл тумани ҳокимлиги фермер аёлга 607 миллион 309 минг 171 сўм компенсация тўлашга мажбур бўлди.

Бу ҳақда «Xabar.uz»га  маълум қилган МИБ жамоатчилик билан алоқалар ва ҳуқуқий ахборот бўйича катта инспектори Ихтиёр Олимовнинг таъкидлашича, Қоракўл туманидаги «Учқун Дўрман замини» ва «Дўрмон Омад нур» фермер хўжаликларига кўп йиллардан буён ёши улуғ фермер аёл Олтиной Соттиева раҳбарлик қилиб келган. 2018 йилда белгиланган режаларни бажариб келган фермер хўжаликлари кутилмаган муаммога дуч келган. Туман ҳокимининг 2018 йил июндаги қарори билан фермер хўжаликлари билан тузилган ер ижара шартномаси бекор қилиниб, улар фойдаланиб келган 203 гектар ер майдони ҳокимлик захирасига олинган ва бошқа фермерларга тақсимлаб берилган.

Фермер хўжаликлари мазкур қарордан норози бўлиб, судга мурожаат қилишган. Натижада туман Маъмурий судининг 02.08.2018 йилдаги қарори билан ҳоким қарори бекор қилинган. Бироқ, шунга қарамасдан, низо шу билан тугамаган.  Туман ҳокимлиги фермер хўжалиги билан тузилган ижара шартномасини бекор қилиш талаби билан судга даъво киритган.  Иш туман ва вилоят судларида кўриб чиқилиб, охир-оқибат, Олий судгача етиб борган.

Олий суд иқтисодий ишлар бўйича судлов ҳайъатининг 23.01.2019 йилдаги қарори билан биринчи ва апелляция инстанциялари қарорлари бекор қилинган. Шундан кейин ҳам ер майдонлари фермерларга қайтариб берилмаган. Низоли масала прокуратура томонидан ўрганилиб, Бош прокурор аралашувидан сўнг ер майдонлари яна фермер хўжаликларига қайтарилган.

Олтиной Соттиева вилоят фермер, деҳқон хўжаликлари ва томорқа ер эгалари кенгаши орқали судга мурожаат қилиб, 2017 йилнинг ноябрь ойидан 2018 йилнинг июлигача қилинган харажатлар ва олиниши мумкин бўлган даромадлар учун компенсация ундиришни талаб қилган. Суд фермер хўжаликлари даъвосини қаноатлантирган.

Қоракўл туманлараро иқтисодий судининг 12.12.2023 йилдаги ижро ҳужжатига кўра, Қоракўл тумани ҳокимлигидан «Учқун Дўрман замини» фермер хўжалиги фойдасига 333 миллион 286 минг 744 сўм, «Дўрмон Омад нур» фермер хўжалиги фойдасига эса 273 миллион 979 минг 227 сўм компенсация ундириш белгиланган.

Ижро ҳужжати 26.03.2024 йилда Мажбурий ижро бюросининг Қоракўл тумани бўлими иш юритувига келиб тушган ва ижро ҳаракатлари бошланган. Қонунчиликка мувофиқ, ҳокимликка қарорни ихтиёрий бажариш учун муддат берилган бўлса-да, туман ҳокимлиги суд қароридан норози эканини билдириб, уни бажармай келган. Шу билан бирга, юқори инстанция судларига бир неча бор шикоят аризалари киритилган. Бироқ, бу аризаларнинг барчаси суд томонидан рад этиб келинган.

Ижро жараёнида туман ҳокимлигининг ҳисоб рақамларига банд қўйилган, кўчмас мулклари ва автотранспорт воситаларига таъқиқ ўрнатилган. Ҳокимлик ҳисоб рақамида ортиқча маблағ йўқлигини важ қилиб келган бўлса-да, ижро ҳаракатлари ва суд қарорлари ортидан охир-оқибат қарорни бажаришга мажбур бўлган.

Бўлим давлат ижрочиси томонидан олиб борилган ҳаракатлар натижасида туман ҳокимлигидан фермер хўжаликлари фойдасига жами 607 миллион 309 минг 171 сўм компенсация маблағи ундирилган. Ижро иши амалда якунланган.

Олтиной Соттиевa ундирилган маблағларнинг бир қисмини қишлоқни ободонлаштиришга, қолган қисмини эса фермер хўжалигини ривожлантиришга сарфлашини билдирган.

– Бу воқеа, нафақат, бир фермер аёлнинг ғалабаси, балки, қонун устуворлиги ва ҳақиқат йўлидаги матонатли курашнинг ҳам ёрқин намунаси бўлди, – дейди Ихтиёр Олимов.