Украина президенти Владимир Зеленский урушнинг тўртинчи йиллигида – 24 февраль куни президентлик сайлови ва тинчлик келишуви бўйича референдум ўтказилишини эълон қилишни режалаштирмоқда. Бу ҳақда Financial Times манбаларга таяниб хабар берди.

Нашр маълумотига кўра, Киевда сайлов ва референдумни режалаштириш жараёни АҚШ маъмурияти босими ортидан бошланган. Оқ уй Украинадан ҳар икки овоз беришни 15 майга қадар ўтказишни талаб қилмоқда. Акс ҳолда, Киевга таклиф этилган хавфсизлик кафолатлари бекор қилиниши мумкин.

FT’нинг ёзишича, Вашингтон баҳоргача тинчлик музокараларини якунлашга интилмоқда. АҚШ президенти Дональд Трамп Киевга хавфсизлик кафолатлари кенг қамровли тинчлик келишуви имзоланишига боғлиқ эканини билдирган. Нашрнинг таъкидлашича, бундай келишув Донбасс бўйича муайян ён беришларни талаб қилиши мумкин.

Аввалроқ ҳам FT ва Reuters манбалари хавфсизлик кафолатлари Россия билан тинчлик келишувига эришиш шарти билан боғланаётганини хабар қилган эди.

Эслатиб ўтамиз, 4–5 февраль кунлари Абу-Дабида бўлиб ўтган Украина–Россия–АҚШ уч томонлама учрашувидан сўнг Зеленский АҚШ урушни июнгача тугатишни хоҳлаётганини айтган.

Зеленский офиси FT сўровига расмий жавоб бермаган. Шу билан бирга, «РБК-Украина» нашри манбаси:

«Хавфсизлик бўлмаса, сайлов эълони ҳам бўлмайди», – дея маълум қилган.

Президент офиси раҳбари маслаҳатчиси Михаил Подоляк эса сайлов ўтказиш учун камида фаол ҳарбий ҳаракатлар ва ракета-дрон ҳужумлари тўхтатилиши зарурлигини айтган. Унинг сўзларига кўра, фаол уруш шароитида фуқароларнинг сайловда қатнашиш ва номзод сифатида кўрсатилиш ҳуқуқини таъминлаш қийин. Шунингдек, мавжуд вазиятни ҳисобга олган ҳолда сайлов тизимини қайта ташкил этиш ва қўшимча молиялаштириш талаб этилади.