Хабарлар тезкор Телеграм каналимизда Обуна бўлиш ×

«Шайтанат»: ваъда қилинган 21-қисм қани?

«Шайтанат»: ваъда қилинган 21-қисм қани?

Хабарингиз бор, Ўзбекистон халқ ёзувчиси Тоҳир Малик асари асосида суратга олинган «Шайтанат» видеофильми бир нечта телеканалда намойиш этилди. У орада ҳеч бир сабабсиз 20 йил мобайнида кўрсатилмаган эди. Яқинда эса яна бир нодавлат телеканали орқали намойиш этилди. Аммо ҳали-ҳануз «Шайтанат»нинг 20 та қисми кўрсатиляпти, холос. Ваъда қилинган 21-қисм қани?

2016 йили берган интервьюсида «Шайтанат» фильми режиссёри, продюсери ва бош роль ижрочиси Ёдгор Саъдиев турмуш ўртоғининг руҳини шод этиш учун сўнгги қисм устидаги ишларни якунлаш ниятида эканлигини айтган эди:

— Бундан бир неча йил илгари «Шайтанат»нинг 21-қисмини суратга олиб қўйгандик. Монтаж қилинмаган эди. Турмуш ўртоғим, шуни охирига етказинг, деб ўзи ҳам кўрмай кетди. Ҳозир унинг шу илтимосини бажаряпман. Монтаж тугади ва энди овозлаштириш ишларини ниҳоясига етказсак, унинг илтимосларидан бирини бажарган, руҳини шод қилган бўламан.

2019 йилда Ёдгор Саъдиев «Ютуб»даги «Интервью-ТВ» каналига берган интервьюсида 21-қисм якуний бўлишини маълум қилган эди.

— Мен шу билан «Шайтанат» сериалини тугатдим, — деганди у. — Буёғига қадам ҳам босмайман. Чунки Тоҳир аканинг ҳам сўзини олганман. Шу билан тугатаман десам, яхши қилибсиз, деган.

Эслатиб ўтамиз, «Шайтанат»нинг сўнгги 21-қисмида Нозим Тўлахўжаев ва Улуғбек Қодиров каби актёрлар ҳам роллар ижро этишган.

Хўш, 21-қисм қачон кўрсатилади? Шу савол билан Ёдгор Саъдиевга мурожаат қилдик.

— Биз уни аввал бир телеканалда реклама қилиб, кейин премьерасини ўтказамиз, — деди Ёлгор Саъдиев. — Фалон вақтдан кинотеатрларда қўйилади, деймиз. Уни катта премьера қилиб қўймоқчимиз. Фильмнинг намойишидан олдин актёрларни чақириб, саҳнага чиқариб ўтказамиз.

— Сўнгги қисмни Тоҳир Малик кўрганми?

— Ҳа, кўрсатганман. Маъқул бўлган.

— Премьера қачон? Куни аниқми?

— Йўқ, ҳали номаълум, — деб жавоб берди Ёдгор Саъдиев.

Акбар Фатҳуллаев

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг