Доналд Трамп Ҳўрмуз бўғози орқали нефт ва газ оладиган давлатлар унинг хавфсизлигини таъминлашда ўзи ҳам қатнашиши кераклигини билдирди. У, хусусан, НАТО давлатларини АҚШга ёрдам беришга чақирган. Бу ҳақда Reuters ва бошқа нашрлар хабар берди.

Трампнинг айтишича, Вашингтон бошқа давлатлар билан бўғоз хавфсизлигини таъминлаш ва уни назорат қилишда иштирок этиши бўйича музокара ўтказмоқда. У бу чақириқни «кичик вазифа» деб атаган ва АҚШ НАТОга, жумладан Украина масаласида ёрдам бериб келганини эслатган. Шу билан бирга, у агар иттифоқчилар ёрдам бермаса, НАТО учун «жуда ёмон келажак» бўлиши мумкинлигини ҳам айтган.  

Аммо ҳозирча бир қатор давлатлар бу ташаббусга эҳтиёткор муносабат билдирмоқда. Reuters маълумотига кўра, Япония ва Австралия Ҳурмузга ҳарбий кема юбориш режаси йўқлигини айтган. Германия эса Европа Иттифоқининг мавжуд денгиз миссиясини бу ҳудудга кенгайтиришга шубҳа билан қараётганини билдирган.

Буюк Британия, Франция ва бошқа айрим давлатлар ҳам эҳтиёткор позицияда қолмоқда. Хабарларга кўра, Лондон тўғридан-тўғри ҳарбий қатнашувдан кўра чекланган ёрдам вариантларини кўриб чиқмоқда, Австралия эса уруш кемаси юборишни рад этган.

Айрим таҳлилчилар, Трампнинг ушбу чақириғи НАТО давлатларини Эронга қарши урушга расман қўшилишга очиқчасига эмас, балки Ҳўрмуз бўғози баҳонасида жалб қилишга қаратилганини айтмоқда.