Бугун, 18 март куни Президент Шавкат Мирзиёев «Янги Тошкент» лойиҳаси қурилишига тамал тоши қўйиш маросимида иштирок этмоқда.

Маросимда нутқ сўзлаган давлат раҳбарининг таъкидлашича, бугунги кунда Тошкентда яшаётган ва ишлаётган аҳоли сони қарийб 5 миллионни ташкил қилади. Яқин йилларда бу кўрсаткич яна кўпайиши кутилмоқда.

Бугунги куннинг ўзида шаҳарда йилига 20 мингдан зиёд квартирали кўп қаватли уйлар, 40 дан ортиқ мактаб, боғча, поликлиника қуришга талаб бор.

«Шунинг учун пойтахтимизнинг барқарор ривожланишини ўйлаб, камида 15-20 йил олдин режаларимизни аниқ белгилаб олишимиз зарур», – деди давлат раҳбари.

Қайд этилишича, шуларни инобатга олиб, Буюк Британия, Сингапур, Хитой ва Туркиялик мутахассислар билан Тошкент шаҳрининг 2045 йилгача бўлган Бош режаси лойиҳаси ишлаб чиқилган.

Жумладан, Тошкент вилоятининг чегарадош туманлари ҳисобидан пойтахт ҳудудини босқичма-босқич кенгайтириб, Чирчиқ ва Қорасув дарёлари оралиғида «Янги Тошкент» лойиҳасини амалга ошириш мақсад қилиб олинган.

Маълумот учун, давлат раҳбари бугун Тошкент вилоятида қуёш энергетикаси лойиҳаларига старт бериш маросимида ҳам иштирок этади.  

Эслатиб ўтамиз, аввалроқ «Янги Тошкент» лойиҳаси қайси ҳудудларни қамраб олиши ҳақида маълумот берилган эди.