АҚШ президенти Дональд Трамп Эрон билан келишув имзоланиши яқинлиги ҳақида Исроил–Эрон можароси бошланганидан буён камида 39 марта оммавий баёнот берган. Бу ҳақда CNN телеканали хабар қилди.

Телеканал таҳлилига кўра, Трамп март ойи охиридан буён ҳар уч кунда камида бир марта Вашингтон ва Теҳрон ўртасидаги келишув тез орада имзоланиши мумкинлигини таъкидлаб келган.

Навбатдаги шундай баёнотни у 11 июн куни берди. Трампнинг айтишича, АҚШ ва Эрон ўртасидаги келишув ҳужжатлари деярли тайёр бўлиб, уни шу ҳафта охирида Европада имзолаш мумкин.

«Ҳужжатлар деярли якуний кўринишга келтирилди. Ўйлайманки, барчаси жуда тез ҳал бўлади», – деди АҚШ президенти.

Бироқ Эрон ҳукуматига яқин Tasnim агентлиги маълумотига кўра, келишув ҳали мамлакат раҳбарияти томонидан якуний маъқулланмаган. Манбаларнинг айтишича, ҳужжат ҳозирча тегишли идораларда кўриб чиқилмоқда.

Axios нашрининг ёзишича, муҳокама қилинаётган меморандум Ҳўрмуз бўғозини қайта очиш, Эронга нисбатан айрим санкцияларни юмшатиш ва ўт очишни тўхтатиш режимини 60 кунга узайтиришни назарда тутади. Шу даврда томонлар Эрон ядровий дастури бўйича қўшимча музокаралар ўтказиши режалаштирилган.

Шу билан бирга, Трампнинг келишув бўйича баёноти Исроил бош вазири Бинямин Нетаняху учун кутилмаган ҳолат бўлгани айтилмоқда. Нашр маълумотига кўра, Нетаняху сўнгги кунларда АҚШ маъмуриятидаги яқин ҳамкорлари орқали музокаралар тафсилотларини билишга уринган.