Тошкент Халқаро аэропортида Ҳиндистонга отланган икки нафар йўловчи аёл «жонли контейнер» тарзида тилла қуймаларини олиб ўтишга уринди.                                  

«Тошкент-АЭРО» ихтисослаштирилган божхона комплексининг Шахсий хавфсизлик гуруҳи томонидан олинган тезкор маълумотлар асосида, комплекснинг Контрабандага қарши курашиш шуъбаси тезкор ходимлари ва Халқаро аэропортнинг чегара божхона пости ходимлари билан ҳамкорликда Тошкентдан Деҳли шаҳрига учиб кетаётган икки нафар фуқаролар кузатув остига олинади.                                                

Улар «CIP» учиб кетиш зали орқали ҳаракатланганидан сўнг тегишли тартибда тўхтатилиб, божхона кўригидан ўтказилади. Аёлларни бирма-бир шахсий кўрикдан ўтказиш давомида уларнинг жинсий аъзоси ичига яшириб жойланган, бирида тахминий қиймати 490 млн сўм бўлган 367 грамм қуйма олтин бўлаклари, яна бирида эса 140 грамм оғирликдаги, дастлабки ҳисоб-китобларга кўра, қиймати 190 млн сўм бўлган қуйма олтин бўлаклари борлиги аниқланди.                                                                     

Мазкур ҳолат бўйича божхона органлари томонидан суриштирув ишлари олиб борилмоқда.