Германия канцлери Олаф Шольц 20 сентябрь куни БМТ Бош ассамблеясидаги чиқишида Украина босқини сабаб Россия президенти Владимир Путинни кескин танқид қилди.

«Украина ва бутун дунёда давом этаётган аламу изтиробларнинг сабаби аниқ: Россия президенти ўз империалистик режасини амалга ошириш учун мустақил қўшниси – Украинани босиб олмоқчи... Ўн минглаб аскарлар, шунингдек, украиналик тинч аҳоли вакиллари ўлдирилди. Украиналик ҳисобсиз болалар ўғирланди. Россия қўшини қатл, қийноқ, зўрлаш каби қилмишларни содир этди. Улар шаҳару қишлоқларни ер билан яксон қилди», – деган О.Шольц.

Сиёсатчи БМТ Бош ассамблеясининг февраль сессиясида қабул қилинган Украинада тўлақонли, мустаҳкам тинчлик ўрнатишга доир резолюцияни ёдга олар экан, Кремлдан яна бир карра урушни тўхтатишни талаб қилди. 

«Унутмайликки, ушбу уруш учун Россия жавобгардир. Россия президенти исталган пайтда биргина буйруқ билан унга чек қўйиши мумкин. Бунинг учун эса у биз – БМТга аъзо давлатлар, ўз принципларимизга содиқ эканимизни тушуниб етиши керак», – деб таъкидлаган Германия етакчиси.

Нотиқ Украинада шунчаки ҳудуд учун эмас, балки қадриятлар учун ҳам кураш кетаётганига эътибор қаратган.

«Эркинликсиз дунё зулм, адолатсиз дунё эса диктатурадир. Москва буни аллақачон англаб етиши керак», – деган О.Шольц.

Германия канцлери БМТ Бош ассамблеясидаги ўтган йилги маърузасида ҳам Россиянинг Украинага босқинини кескин қоралаган, Кремлни империализм сиёсати юритишда айблаган эди.

Сиёсатчининг таъкидлашича, тиш-тирноғига қадар қуролланган, ядро аслаҳасига эга, БМТ Хавфсизлик кенгашининг доимий аъзо бўлган мамлакат чегараларни зўравонлик йўли билан ўзгартиришга уринаётган бир пайтда мутараққий дунё қўл қовуштириб ўтириши ярамайди. Шунга кўра у халқаро ҳамжамиятни БМТнинг низом ва қадриятларини ҳимоя қилишга даъват этган.