Давлат Бош санитария врачи Баҳром Алматов коронавирусга чалинганлар сони нима учун камайганлигига изоҳ берди:

«Кетма-кет икки кун коронавирус инфекциясига чалинган берморлар сонининг камайиши — карантин зонасидаги инсонларни алоҳидалаганимиз билан боғлиқ.

Карантин зонасида битта контейнерга фақат 4 нафар одам жойлаштириляпти ва ташқаридан ҳеч ким кириб-чиқмаслиги таъминланяпти. Шу боис карантин зонада ушбу касалликни юқтириб олиш ҳолати кескин камайди.

Бироқ бу вазият бутунлай яхшиланди деган хулоса келиб чиқиши учун асос эмас. Карантин зонасидан ташқарида ҳам ушбу вирус ташиш ҳолатлари бўлиши мумкин ва барчасини назорат остида ушлаш учун карантин режимига қатъий амал қилишимиз лозим».

13 апрель куни Ўзбекистонда жами 133 кишида инфекция аниқлангани хабар қилинганди.  Сўнг 14 апрелда кун давомида беморлар сони 167 кишига кўпайди. Бу ҳозирча юртимизда қайд этилган энг юқори кўрсаткич бўлиб турибди.

15 апрель куни соат 10:00 ҳолатига кўра 49 кишида инфекция аниқланган бўлса, соат 16:00 ҳолатида 61 кишида, 22:30 да яна 27 кишида касаллик қайд этилганди. Кун давомида беморлар сони 137 кишига ортди.

16 апрелда 47 нафар янги бемор рўйхатга олиниб, жами касалланганлар сони 1349 нафарга етгани айтилди.

17 апрелнинг ҳозирги вақтига келиб, 41 кишида инфекция аниқланган.