Президентнинг жорий йил 2 январдан кучга кирган ПҚ-467-сон қарори билан таҳлилий ва тадқиқот тузилмалар фаолиятини ташкил қилиш бўйича тузилган Мувофиқлаштирувчи кенгаш ҳузурида Тадқиқотларни қўллаб-қувватлаш жамғармаси ташкил этилади. 

Бу ҳақда Президентнинг 10 февралдаги ПҚ-48-сон қарорида белгилаб қўйилди.  

Ҳужжатга мувофиқ, жамғарма маблағлари Тикланиш ва тараққиёт жамғармасида алоҳида очилган ҳисобрақамларда жамланади ва Мувофиқлаштирувчи кенгаш томонидан белгиланган тартибда сарфланади.

Жамғарма маблағлари қуйидагиларга йўналтирилади, жумладан:

• мувофиқлаштирувчи кенгашнинг фаолият йўналишлари бўйича тадқиқотларни амалга ошириш;
• таҳлилий материалларни тайёрлаш ва тадқиқотларни ўтказиш учун грантлар ажратиш;
• ижтимоий сўровлар ва жамоатчилик фикрини ўрганиш бўйича тадқиқотларни амалга ошириш.

Жамғарма маблағлари мақсадли ва самарали сарфланиши устидан назорат Мувофиқлаштирувчи кенгаш томонидан амалга оширилади.

Мувофиқлаштирувчи кенгашга эса қуйидагиларга рухсат берилади:

• Жамғарма маблағларини миллий ва хорижий валюталарда банк депозитларига жойлаштириш;
• грантлар ва беғараз техник кўмак воситаларини жалб қилиш;
• жисмоний ва юридик шахсларга тўлов асосида тадқиқотлар натижалари ва маълумотлар базаларидан фойдаланиш ҳамда тадбирларда иштирок этиш имкониятларини бериш.