Prezidentning joriy yil 2-yanvardan kuchga kirgan PQ-467-son qarori bilan tahliliy va tadqiqot tuzilmalar faoliyatini tashkil qilish bo‘yicha tuzilgan Muvofiqlashtiruvchi kengash huzurida Tadqiqotlarni qo‘llab-quvvatlash jamg‘armasi tashkil etiladi. 

Bu haqda Prezidentning 10-fevraldagi PQ-48-son qarorida belgilab qo‘yildi.  

Hujjatga muvofiq, jamg‘arma mablag‘lari Tiklanish va taraqqiyot jamg‘armasida alohida ochilgan hisobraqamlarda jamlanadi va Muvofiqlashtiruvchi kengash tomonidan belgilangan tartibda sarflanadi.

Jamg‘arma mablag‘lari quyidagilarga yo‘naltiriladi, jumladan:

• muvofiqlashtiruvchi kengashning faoliyat yo‘nalishlari bo‘yicha tadqiqotlarni amalga oshirish;
• tahliliy materiallarni tayyorlash va tadqiqotlarni o‘tkazish uchun grantlar ajratish;
• ijtimoiy so‘rovlar va jamoatchilik fikrini o‘rganish bo‘yicha tadqiqotlarni amalga oshirish.

Jamg‘arma mablag‘lari maqsadli va samarali sarflanishi ustidan nazorat Muvofiqlashtiruvchi kengash tomonidan amalga oshiriladi.

Muvofiqlashtiruvchi kengashga esa quyidagilarga ruxsat beriladi:

• Jamg‘arma mablag‘larini milliy va xorijiy valyutalarda bank depozitlariga joylashtirish;
• grantlar va beg‘araz texnik ko‘mak vositalarini jalb qilish;
• jismoniy va yuridik shaxslarga to‘lov asosida tadqiqotlar natijalari va ma’lumotlar bazalaridan foydalanish hamda tadbirlarda ishtirok etish imkoniyatlarini berish.