2026 йил май ойида Ўзбекистон олтин экспортини тўхтатди.

Spot нашрининг Миллий статистика қўмитаси маълумотларига таяниб ёзишича, жорий йилнинг январ–май ойларида мамлакат экспорти 12,6 миллиард АҚШ долларини ташкил этган. Бу ўтган йилнинг шу даврига нисбатан 15,5 фоизга кам. Экспортнинг пасайишига асосий сабаб сифатида олтин экспорти ҳажмининг кескин қисқариши кўрсатилган.

Беш ой давомида Ўзбекистон 1,5 миллиард долларлик олтин экспорт қилди. Бу ўтган йилнинг мос давридаги 6,49 миллиард долларга нисбатан қарийб 4,3 баробар кам.

Маълум қилинишича, Ўзбекистон апрел ойида олти ойлик танаффусдан сўнг олтин экспортини қайта тиклаган, аммо май ойида қимматбаҳо металл экспорти яна амалга оширилмаган.

Шу билан бирга, олтиндан ташқари экспорт йўналишларида ижобий ўсиш қайд этилди. Хизматлар экспорти 34,9 фоизга ошиб 4,58 миллиард долларга, саноат маҳсулотлари экспорти эса 18 фоизга ўсиб 1,9 миллиард долларга етди.

Май ойида Ўзбекистоннинг олтин-валюта захиралари 70,5 миллиард долларни ташкил этди. Бир ой ичида захиралар 307,2 миллион долларга камайган бўлса-да, Марказий банк омборларидаги олтиннинг жисмоний ҳажми аксинча ошди.

Марказий банк маълумотларига кўра, мамлакатнинг олтин захираси 423 тоннага етган. Бир ойда захиралар қарийб 9,3 тоннага кўпайган.

Шунингдек, World Gold Council маълумотларига кўра, Ўзбекистон 2026 йилнинг дастлабки тўрт ойи якунлари бўйича дунёдаги энг йирик олтин харид қилувчи давлатлардан бири бўлган. Марказий банк апрел ойида 1 тонна олтин сотган бўлса, йил бошидан буён олтин захираларини 24 тоннага оширган.