Ўзбекистонда ОВИР бекор бўлади, икки турдаги паспорт ва ID-карта жорий қилинади
![Ўзбекистонда ОВИР бекор бўлади, икки турдаги паспорт ва ID-карта жорий қилинади](https://xabar.uz/static/crop/1/3/920__95_1375023576.jpg)
Норматив ҳуқуқий ҳужжатларнинг муҳокамаси порталида Ўзбекистон Республикасида паспорт тизимини янада такомиллаштириш чора-тадбирлари тўғрисидаги қарор лойиҳаси муҳокамага қўйилди. Унда мамлакатимизда учта ҳужжатни: мамлакат ичидаги биометрик паспорт, четга чиқиш учун биометрик паспорт ва ID-картани жорий қилиш таклиф этилмоқда.
Қайд этиш лозимки, қарор лойиҳасида 2019 йилнинг 1 январидан хорижга чиқиш учун рухсатномани (стикер) расмийлаштириш бекор қилиниши кўзда тутилган. Унинг ўрнини хорижга чиқиш учун алоҳида биометрик паспорт эгаллайди.
Ҳужжатга кўра:
- Ўзбекистон фуқаросининг биометрик паспорти — Ўзбекистон ҳудудида шахсни тасдиқловчи ҳужжат. Шунингдек, у электрон ахборот ташувчи (чип)га эга бўлиб, Ўзбекистон фуқаролигини ҳам тасдиқлайди;
- чет элга чиқиш учун биометрик паспорт — Ўзбекистон Республикаси фуқаролигини ва унинг эгаси шахсини хорижга чиқиш ва мамлакат ҳудудига кириш чоғида тасдиқловчи ҳужжат;
- идентификацион электрон карта (ID-карта) — ўз эгасининг шахсини мамлакат ҳудудида тасдиқловчи ҳужжат. У фуқаронинг ягона идентификация рақамини, унинг шахсий маълумотларини ўз ичига олиб, давлат хизматларидан фойдаланишда шахсни аниқлаш учун қўлланилади.
Чет элга чиқиш учун биометрик паспорт фуқароларга қуйидаги амал қилиш муддати билан берилади:
- Туғилган кунидан бир йилгача — икки йил муддатга;
- Бир ёшдан 16 ёшгача — 5 йиллик муддатга;
- 16 ёшдан катталарга — 10 йил муддатга.
Лойиҳа ўзгартирилиши, унга қўшимча киритилиши ёки рад этилиши мумкин.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter