Олий Мажлис Қонунчилик палатаси мажлисида «Халқаро фуқаро авиацияси тўғрисидаги конвенцияга киритилган ўзгартиришлар билан боғлиқ баённомаларни ратификация қилиш ҳақида»ги қонун лойиҳаси кўриб чиқилиб, учинчи ўқишда қабул қилинди. Ҳужжат энди кўриб чиқиш учун Сенатга юборилди.

Қонун лойиҳасига мувофиқ, Халқаро фуқаро авиацияси тўғрисидаги Чикаго конвенциясига киритилган бир қатор ўзгартиришлар ратификация қилинади. Жумладан, конвенциянинг 50 (а)-моддасига асосан Халқаро фуқаро авиацияси ташкилоти Кенгаши аъзолари сони 36 тадан 40 тагача оширилади.

Шунингдек, конвенциянинг 56-моддасига мувофиқ Аэронавигация комиссияси аъзолари сони 19 тадан 21 тагача кўпайтирилиши белгиланмоқда.

Муҳокамалар чоғида Халқаро фуқаро авиацияси ташкилотига аъзо давлатлар сони йил сайин ортиб бораётгани таъкидланди. Шу билан бирга, халқаро ҳаво транспортининг жаҳон иқтисодиётидаги аҳамияти ҳам тобора кучаймоқда.

Депутатлар фикрича, Кенгаш таркибининг кенгайтирилиши ташкилотга аъзо мамлакатлар учун қарор қабул қилиш жараёнларида кенгроқ иштирок этиш имконини яратади.

Қайд этилишича, мазкур қонуннинг қабул қилиниши Ўзбекистоннинг Чикаго конвенцияси доирасидаги халқаро мажбуриятларини тўлиқ бажаришини таъминлайди.