Испаниялик теннисчи Рафаэл Надал Улкан тож турнирларидаги 21-ғалабаси билан янги рекорд ўрнатди.

Бугун, 30 январь куни Австралия очиқ чемпионати финалида Рафаэл Надал осон кечмаган ўйинда россиялик Даниил Медведевни мағлубиятга учратди — 2:6, 6:7, 6:4, 6:4, 7:5. Ўйин беш соат ва йигирма тўрт дақиқа давом этди.

2022 йилги Австралия очиқ чемпионатига қадар Улкан тож турнирларида ғалабалари сони 20 тани ташкил этувчи теннисчилар уч нафар эди — Рожер Федерер, Новак Жокович ҳамда Рафаэл Надал. Медведев устидан қозонилган ғалаба Надални замонамизнинг энг кучли теннисчилари орасида бир қадам олдинга олиб чиқди.

Эслатиб ўтамиз, Новак Жокович вакцинация можароси туфайли Австралия очиқ чемпионатида қатнаша олмаганди.

Рафаэл Надалнинг Улкан тож турнирларидаги ғалабалари:

• Франция очиқ чемпионати — 13 (2005, 2006, 2007, 2008, 2010, 2011, 2012, 2013, 2014, 2017, 2018, 2019, 2020)
• АҚШ очиқ чемпионати — 4 (2010, 2013, 2017, 2019)
• Уимблдон турнири — 2 (2008, 2010)
• Австралия очиқ чемпионати — 2 (2009, 2022)