Олий Мажлис Қонунчилик палатаси депутати Гулрух Агзамова Тошкент метрополитени инфратузилмасида кузатилаётган техник муаммолар юзасидан транспорт вазири Илҳом Маҳкамовга депутатлик сўрови юборди.

Сўровда айрим метро бекатлари ва тоннелларда сув сизиши, бунинг оқибатида «Беруний», «Ғафур Ғулом», «Алишер Навоий» ва «Космонавтлар» бекатларидаги керамика панноларига зарар етаётгани қайд этилган. Шунингдек, метро кўприклари таянчлари атрофидаги тупроқнинг ювилиши иншоотлар хавфсизлигига таъсир қилиши мумкинлигига эътибор қаратилган.

Депутат «Чорсу», «Ғафур Ғулом» ва «Алишер Навоий» бекатларида 1984 йилдан буён ишлаб келаётган эскалаторларни замонавий ускуналарга алмаштириш, шунингдек, Чилонзор йўналишидаги эскирган тортиш станциясини янгилаш зарурлигини таъкидлаган.

Бундан ташқари, ногиронлиги бўлган шахслар учун ўрнатилган электрон кўтаргичларнинг тўлиқ ишламаётгани ва ерости бекатларида тактил йўлаклар етишмаслиги ҳам кўтарилган.

Депутат транспорт вазиридан метро бекатлари ва тоннеллардаги сув сизишини бартараф этиш, кўприклар мустаҳкамлигини таъминлаш, имконияти чекланган шахслар учун қулай муҳит яратиш ҳамда йўловчилар хавфсизлигини кучайтириш бўйича кўрилаётган чоралар ҳақида 10 кун ичида асослантирилган жавоб тақдим этишни сўради.