АҚШ президенти Дональд Трамп Канадага нисбатан босимни кучайтириб, бу сафар АҚШ–Канада ўртасидаги стратегик аҳамиятга эга инфратузилма объекти — Горди Хоу чегара кўпригига эътибор қаратди.

Трампнинг айтишича, АҚШ Канададан тўлиқ компенсация олмагунча мазкур кўприкни очишга рухсат берилмайди. У бу ҳақда Truth Social платформасида ёзди.

«Канада АҚШ берган барча ёрдамни тўлиқ қопламагунича, мен бу кўприкни очишга йўл қўймайман», – деган у.

Президент, шунингдек, Канаданинг АҚШга нисбатан «адолатли ва ҳурмат билан» муносабатда бўлиши кераклигини таъкидлаб, кўприкнинг камида ярми АҚШ мулки бўлиши лозимлигини билдирди.

Трампнинг бу позицияси Мичиган штатидаги демократлар томонидан кескин танқид қилинди. Штат губернатори Гретхен Уитмер матбуот котибининг маълум қилишича, кўприк қурилиши тўлиқ Канада томонидан молиялаштирилган ва уни эксплуатация қилиш қўшма мулкчилик асосида амалга оширилади. Унинг сўзларига кўра, «кўприк ҳар қандай ҳолатда ҳам очилади».

Мичиган сенатори Элисса Слоткин эса Трампни ўзи бошлаган савдо уруши учун штат аҳолисини жазолашда айблади.

Маълумотларга кўра, фақат 2023 йилнинг ўзида Детройт ҳудудидаги ушбу чегара ўтиш пункти орқали юк машиналарида 126 миллиард долларлик товарлар ташилган. АҚШ Канада учун энг йирик савдо ҳамкори бўлиб қолмоқда.

ОАВларга кўра, Трампни айниқса Канаданинг кўприкнинг ҳар икки томонини назорат қилиши ва қурилишда деярли америкалик маҳсулотлар қўлланилмагани норози қилмоқда. Шу билан бирга, у Канада бош вазири Марк Карнини ҳам танқид қилиб, уни Хитой билан яқинлашишда айблади. Трампга кўра, бундай келишув «Канадани Хитой таъсирига тўлиқ олиб киради».

Аввалроқ Дональд Трамп Канада Хитой билан савдо битими тузса, 100 фоизлик бож жорий этиш билан ҳам таҳдид қилган эди.