АҚШ президенти Дональд Трамп Конгрессда анъанавий мурожаати билан чиқиш қилди. У 1 соату 48 дақиқа давом этди ва сўнгги 60 йил ичидаги энг узун президентлик мурожаатларидан бири бўлди.

Олий суд қарори ва тарифлар

Трамп АҚШ Олий судининг божхона божлари бўйича қарори «умидсиз ва омадсиз» бўлганини айтди. Шу билан бирга, у кўплаб давлатлар аввал тузилган келишувларни сақлаб қолиш истагида эканини ва ҳамкорлик давом этишини таъкидлади.

Россия — Украина уруши

Президент ҳар ой ўртача 25 мингга яқин ҳарбий ҳалок бўлаётганини айтиб, Россия ва Украина ўртасидаги қон тўкилишни тўхтатиш устида иш олиб борилаётганини билдирди. У президент сифатида мумкин бўлган жойда тинчликка эришишга ҳаракат қилишини, аммо АҚШга таҳдид солувчи кучларга қарши қатъий чора кўришдан тийилмаслигини қайд этди.

Эрон ва ядровий таҳдид

Трампнинг айтишича, Эрон Европага ва хориждаги АҚШ ҳарбий базаларига ета оладиган ракеталар ишлаб чиққан, ҳозир эса АҚШ ҳудудигача етадиган ракеталар устида ишламоқда. У дипломатик йўлни афзал кўришини, аммо «терроризмнинг асосий ҳомийси» деб атаган Эроннинг ядровий қуролга эга бўлишига йўл қўймаслигини билдирди.

Ички хавфсизлик ва чегара

Трамп демократларни мамлакат Ички хавфсизлик департаментини молиялаштиришни тўхтатганликда айблади. У чегара хавфсизлиги учун маблағларни тўлиқ ва зудлик билан тиклашни талаб қилди.

Коррупцияга қарши кураш

Президент тўртта демократлар бошқараётган штатда коррупция жиддий муаммо эканини айтди. Унга кўра, вице-президент Жэмс Девид Венс солиқ тўловчиларга миллиардлаб доллар зарар келтираётган фирибгарликларга қарши курашга раҳбарлик қилади.

«Американинг олтин асри»

Трамп ҳозир АҚШ чегаралари ҳимоялангани, армия ва полиция тўлиқ таркибда экани ҳамда мамлакат халқаро майдонда яна ҳурмат қозонганини таъкидлади. У 4 июль куни нишонланадиган Америка мустақиллигининг 250 йиллигини тилга олиб, бу даврни «Американинг олтин асри» деб атади.