Ўтган якшанба, 8 август куни 32-Ёзги Олимпия ўйинлари ниҳоясига етди. Мухлисларсиз ўтса-да, Токио-2020 дан унутилмас таассуротлар қолди. Пандемия шароитида спорт байрамининг ўтказилиши дунё аҳлининг саросима ва қўрқувларини аритди, бироз бўлса-да юқори кайфият ва умид берди.

Токио Олимпиадаси янги номларни кашф этди, шу билан бирга, айрим афсоналар билан хайрлашдик. Оксана Чусовитина...

Оксана 46 ёшида саккизинчи Олимпиадасига борди. Аксарият гимнастикачилар фаолиятини 25 ёшидаёқ якунлайди...

Чусовитина спортчилик фаолиятини тўхтатишини Кунчиқар юртда, Олимп чўққисида эълон қилишида рамзийлик бор.

Қарсаклар садолари остида кўзда ёш билан хайрлашиш учун охирги марта платформага чиққан Оксана камерага ишора қилиб, юрагини кўрсатди: «Мухлислик қилганингиз учун сизга катта раҳмат!».

«Aфсуски, финалга чиқа олмадим, лекин ўйлайманки, бунинг ҳеч қандай қўрқинчли томони йўқ, — деди спортчимиз. — Чунки мен гимнастикада, спортнинг ушбу турида қўлимдан келган барчасини қилдим. Бугун шундай тугаганидан хурсандман — оёқда қолдим ва йиқилмадим».

Оксана Чусовитинанинг совринлари:

• Собиқ иттифоқ бирлашган жамоаси таркибида олимпия чемпиони (Барселона-1992);
• Таяниб сакраш (спорт гимнастикаси) бўйича олимпия кумуш медали (Пекин-2008);
• Уч карра жаҳон чемпиони (1991, 2003);
• Жаҳон чемпионатларининг тўрт карра кумуш медали (1991, 2001, 2005, 2011);
• Европа чемпиони (2008);
• Европа чемпионати кумуш медали (2002);
• Европа чемпионати бронза медали (1994, 2007);
• Осиё ўйинларининг кўп карра совриндори;
• Саккизта Олимпиадада қатнашган ягона гимнастикачи сифатида Гиннеснинг рекордлар китобига киритилган;
• Спорт фаолиятини давом эттираётганлар орасида биринчи бўлиб Спорт гимнастикаси халқаро шон-шараф залига киритилган.

Оксана Чусовитинанинг спортдаги илк қадамлари (видео)