Дунёда Олий таълим муассасаларини баҳоловчи кўплаб рейтинглар мавжуд бўлиб, Quacquarelli Symonds (QS), Times Higher Education (THE), Academic Ranking of World Universities (ARWU) рейтинглари улар орасида етакчилиб қилиб келмоқда.

Шундай рейтинглардан яна бир халқаро эътироф этилгани Индонезия университети томонидан 2010 йилда таъсис этилган – «UI GreenMetric»дир. Унинг асосий мақсади университетларда чиқиндиларни қайта ишлаш, электр-энергияси ва ичимлик сувидан оқилона фойдаланиш, атроф муҳитга зарар етказмаслик, яшилликни борича асраб қолишни қўллаб-қувватлаш ва уларнинг рейтингини тузишдан иборат.

Шу йилнинг 7 декабрь санасида 2020 йилги UI GreenMetric дунё университетлари рейтинги натижалари ва тақдирлаш бўйича халқаро тадбир ўтказилди. 

2020 йилда мазкур рейтингда дунёнинг 1000 га яқин энг илғор ва яшил университетлари иштирок этди. Эътиборлиси, бу йилги рейтингдан Ўзбекистон ОТМларидан Мирзо Улуғбек номидаги Ўзбекистон миллий университети ҳамда Тошкент ирригация ва қишлоқ хўжалигини механизациялаш муҳандислари институти ҳам ўрин олди.

Мазкур ОТМлар атроф-муҳитга кам зарар еткaзаётган, яшилликка бурканган университетлар қаторидан жой олиши Ўзбекистонда электр-энергиясидан оқилона фойдаланиш, чиқиндиларни қайта ишлаш ва экологияга зарар етказмаслик ва ичимлик сувидан самарали фойдаланишга ундайди.