АҚШ президенти Дональд Трамп НАТОни танқид қилиб, альянсни АҚШни етарлича қўллаб-қувватламаганликда айблади.

У НАТО бош котиби Марк Рютте билан Оқ уйда учрашув ўтказганидан сўнг ижтимоий тармоқда «НАТО бизга керак бўлганда ёнимизда эмас эди» дея баёнот берди.

Трамп, шунингдек, айрим европалик иттифоқчиларни ҳарбий ва сиёсий ёрдамни чеклаганликда айблади.

Рютте эса ўз навбатида мувозанатли позицияни билдириб, барча давлатлар ўз мажбуриятларини бажармаганини тан олди, бироқ кўпчилик Европа давлатлари АҚШга логистика ва базалар бўйича ёрдам берганини таъкидлади.

Аввалроқ, уруш давомида айрим Европа давлатлари АҚШ ва Исроилга ҳудудларидан фойдаланиш бўйича чекловлар жорий этгани хабар қилинганди. Жумладан, Испания ҳаво ҳудудини ёпди, Италия айрим базалардан фойдаланишни чеклаб қўйди. Франция эса маълум шартлар асосида аэропортларидан фойдаланишга рухсат берди.

ОАВ маълумотларига кўра, Вашингтон айрим НАТО давлатларига нисбатан чора кўришни кўриб чиқмоқда. Жумладан, АҚШ қўшинларини Германия ёки Испаниядан чиқариб, Полша ва Руминияга кўчириш варианти муҳокама қилинмоқда.

Мутахассислар фикрича, бундай қарорлар Европа хавфсизлик тизимига ва Россия билан муносабатларга таъсир кўрсатиши мумкин.