Andijonda hokim yordamchisi 7 mln so‘m pora olayotganida ushlandi
![Andijonda hokim yordamchisi 7 mln so‘m pora olayotganida ushlandi](https://xabar.uz/static/crop/1/4/920__95_1447218628.jpg)
Andijon viloyati Jalaquduq tumanida 44 ta xonadonga imtiyozli narxda ko‘mir ajratishni va’da qilgan hokim yordamchisi ushlandi.
Bosh prokuratura huzuridagi Departament bergan xabarga ko‘ra, Departamentning Andijon viloyat boshqarmasi tomonidan DXX va IIB xodimlari bilan hamkorlikda o‘tkazilgan tezkor tadbirda poraxo‘rlik bilan bog‘liq jinoyat fosh qilindi.
Aniqlanishicha, Jalaquduq tumani hokimi yordamchisi D.I. kuz-qish mavsumida ko‘mir yonilg‘isi yetkazib berilishini nazorat qilish va xavfsizligini ta’minlash bo‘yicha ishchi guruh a’zosi sifatida tuman ko‘mir omboriga nazorat uchun mas’ul etib biriktirilganligidan foydalanib, hududdagi 44 ta xonadon uchun 38,1 tonna ko‘mirni imtiyozli narxda ajratib berishi evaziga «U.K.» MFY faoli M.A.dan 600 AQSh dollari pora talab qilgan.
Tezkor tadbirda ushbu pullar hisobidan 7 mln so‘mni ko‘mir ombori hududida o‘zining boshqaruvidagi «Nexia-2» rusumli avtomashinasida olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter