Yengil avtomobillarni notarial tasdiqsiz 30 kunga ijaraga berish mumkin bo‘ldi
![Yengil avtomobillarni notarial tasdiqsiz 30 kunga ijaraga berish mumkin bo‘ldi](https://xabar.uz/static/crop/1/5/920__95_1573440298.jpg)
Prezident tomonidan Iqtisodiyotning jadal rivojlanishini ta’minlashga doir qo‘shimcha chora-tadbirlar qabul qilinishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risidagi Qonun imzolandi. Bu haqda Adliya vazirligining «Huquqiy axborot» kanali xabar berdi.
Qonun bilan bir qator qonunlarga o‘zgartirish va qo‘shimchalar kiritildi.
Xususan, Fuqarolik kodeksiga kiritilgan o‘zgartirishga muvofiq endilikda avtomototransport vositalarini o‘ttiz kungacha bo‘lgan muddatga ijaraga berish shartnomalarini notarial tasdiqlash shart emas.
Yengil avtomobillar va mototransport vositalarini ijaraga berish bo‘yicha xizmat ko‘rsatadigan yuridik shaxslar jismoniy shaxslar bilan yengil avtomobillar va mototransport vositalarini o‘ttiz kungacha bo‘lgan muddatga ijaraga berish shartnomalarini oddiy yozma shaklda tuzishlari mumkin.
Mazkur o‘zgartirish Adliya vazirligi tomonidan ijara bozorini rivojlantirish, jumladan ichki va tashqi turistlar uchun avtomobil turizmini ustuvor rivojlantirish va ularga qo‘shimcha qulayliklar yaratish maqsadida taklif etilgan edi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter