Android qurilmalar uchun Xabar.uz mobil ilovasi. Yuklab olish ×
IOS qurilmalar uchun Xabar.uz mobil ilovasi. Yuklab olish ×

«G‘o‘la» odam tarixi

«G‘o‘la» odam tarixi

Uni qirg‘inbarot urush shu ahvolga solgan

Ushbu fotosurat ijtimoiy tarmoqlarda tez-tez ko‘rinib qoladi va har safar ifodalab bo‘lmaydigan o‘zgacha hislar uyg‘otadi. Xo‘sh, bu «g‘o‘la» odam kim? U oyoqlaridan qay tarzda judo bo‘lgan edi?

Ism-sharifi Anatoliy Leopoldovich Golimbiyevskiy. Ikkinchi jahon urushi davrida Novorossiyskdagi Semes buxtasida ilk jang olib borgan «Idrokli» («Coobrazitelniy») eskadra minosetssida motorchi bo‘lgan. Dushmanga qarshi matonatli kurashgan. Janglardan birida og‘ir yaralangan. O‘shanda jami 4 askar omon qolgan edi.

Qizil flotchi Anatoliy Golimbiyevskiy Kichik yerga qo‘ndirilgan birinchi dengiz piyodalari desanti tarkibida bo‘lgan. Uni jang maydonida topganlarida qo‘l-oyoqlari jarohatlangan edi.

Dovyurak matrosni Tbilisi gospitalida vrachlar qutqarib qolishdi, biroq yaroqsiz oyoqlarini kesib tashlashga to‘g‘ri keldi. Qizil flotchi bunga shu qadar hayotsevarlik bilan javob qaytardiki, bosh hamshira – gruzin qizi Mirsaning ko‘ngliga yo‘l topdi va unga uylanishga muyassar bo‘ldi. Ularning oilasida Tamara tug‘ildi. Yillar o‘tib, Tamara ota-onasiga nabira hadya etdi. Anatoliy Leopoldovich evarasini ham kutib oldi.

Golimbiyevskiy ko‘rsatgan jasoratlar kontr-admiral S.S.Vorkov «Idrokli» haqida yozgan memuarda batafsil yoritilgan.

Anatoliy Golimbiyevskiy 80 yil umr ko‘rdi. Uning «oltin qo‘llari» metrologiya institutida ish berdi. Bu dargohda Golimbiyevskiy butun umri mobaynida yetakchi muhandis bo‘lib xizmat qildi va minglab mexanizm, qurilma va asboblar tayyorladi. U shahar bo‘ylab va dala hovlisiga qo‘li bilan boshqarishga moslashtirgan avtomobilida o‘zi qatnardi.

Matroslar chest berib turgan fotosurat 1989 yili Leningrad qirg‘og‘ida suratkash Ivan Kurtov tomonidan muhrlangan. Unda Naximov bilim yurti kursantlari ofitser boshchiligida faxriy Golimbiyevskiyga chest berayotgani aks etgan. Fotosuratni eng birinchi bo‘lib «Smena» jurnali chop etgan edi.

Anatoliy Leopoldovich Golimbiyevskiy 1921 yil 19 iyulda tug‘ilib, 2001 yili hayotdan ko‘z yumgan.

A.Fathullayev

Izohlar 0

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring