AQSh ma’muriyati prezident Donald Trampga qarshi impichment tahdidi tufayli Grenlandiyani egallab olish haqidagi fikrini o‘zgartirdi. Bu haqda manbalarga asoslanib Reuters xabar berdi. 

Agentlik ma’lumotlariga ko‘ra, Grenlandiya atrofidagi keskinlik prezident administratsiyasi rahbari o‘rinbosari Stiven Millerning 5 yanvar kuni CNN telekanaliga bergan intervyusidan keyin kuchaygan. Orolni kuch bilan egallab olish ehtimoli haqida to‘g‘ridan-to‘g‘ri so‘ralganda, Miller aniq javob bermadi. Reuters xabar berishicha, bundan so‘ng Donald Trampning o‘zi va uning ma’muriyati a’zolari Grenlandiyaga qarshi kuch ishlatish haqida tez-tez gaplasha boshladilar. 

AQShdagi ikkala partiya vakillari ham Tramp Kongress roziligisiz Venesueladagi kabi Grenlandiyada harbiy operatsiya o‘tkazishi mumkinligidan xavotir bildirishdi. Qonun chiqaruvchilar bu masala bo‘yicha o‘z pozitsiyalarini Davlat kotibi Marko Rubio va Oq uyning boshqa rasmiylari bilan o‘rtoqlashdilar. Reuters xabar berishicha, respublikachilar Donald Tramp ma’muriyatini Grenlandiyaga harbiy aralashuv impichmentga olib kelishi mumkinligi haqida ogohlantirgan. 

Amerika prezidenti bir necha bor Qo‘shma Shtatlar milliy xavfsizlikni ta’minlash uchun Grenlandiyaga muhtojligini ta’kidlagan. Aks holda, Donald Trampning tushuntirishicha, orol Rossiya yoki Xitoy tomonidan egallab olinadi.

22-yanvar kuni NATO Bosh kotibi Mark Ryutte bilan muzokaralar chog‘ida Tramp Grenlandiya bo‘yicha rejaga kelishib oldi, uning tafsilotlari ommaga oshkor qilinmadi. Axios ma’lumotlariga ko‘ra, kelishuv Qo‘shma Shtatlarga orolda o‘zining harbiy mavqeini mustahkamlash imkonini beradi. Bundan tashqari, Qo‘shma Shtatlar Grenlandiyada foydali qazilmalarni qazib olish uchun imtiyozlarga ega bo‘lishi mumkin.