O‘zbekiston Milliy universitetida «Karera kuni» mehnat yarmarkasi tashkil etildi
![O‘zbekiston Milliy universitetida «Karera kuni» mehnat yarmarkasi tashkil etildi](https://xabar.uz/static/crop/1/1/920__95_1171077256.jpg)
Mirzo Ulug‘bek nomidagi O‘zbekiston milliy universitetida talabalar va o‘qishni tamomlayotgan yosh mutaxassislar bilan tashkilot, korxona vakillarining jonli muloqotini tashkil etish, mavjud bo‘sh ish o‘rinlari to‘g‘risida ma’lumotlar berish hamda talabalarning bandligini ta’minlash maqsadida «Karera kuni» mehnat yarmarkasi tashkil etildi.
Mehnat yarmarkasida universitetning asosiy buyurtmachi tashkilotlari hamda 100 dan ortiq boshqa korxona va tashkilotlar (tijorat banklari, sug‘urta kompaniyalari, xususiy sektor tashkilotlari, uyushmalar) ishtirok etdi. Bitiruvchilarga tegishli tarmoqlar va mutaxassisliklar bo‘yicha ko‘plab bo‘sh ish o‘rinlari to‘g‘risida ma’lumotlar taqdim etildi.
O‘zbekiston Respublikasi Prezidenti raisligida 2024 yil 23 fevral kuni «Yoshlar bandligini ta’minlash chora-tadbirlari»ga bag‘ishlangan videoselektor yig‘ilishi o‘tkazilib, mazkur yig‘ilishda yoshlarga sifatli ta’lim berish, kasb-hunarga o‘qitish va ularning bandligini ta’minlashga alohida e’tibor qaratilgan va bir qator muhim vazifalar belgilab berilgan edi.
Mazkur mehnat yarmarkasi davlatimiz rahbari tomonidan belgilab berilgan vazifalar ijrosini ta’minlash yuzasidan «Yangi O‘zbekistonni birgalikda barpo etamiz!» shiori ostidagi «Talabalar bahori — 2024» an’anaviy festivali doirasida tashkil etildi.
Joriy o‘quv yilida universitetni 7000 dan ortiq bitiruvchi tamomlab, diplom oladi. Mehnat yarmarkasi ushbu bitiruvchilarga munosib ish o‘rinlarini topishlari uchun xizmat qiladi.
Bugungi kunda universitetda talabalarni ishga joylashishlariga ko‘maklashish maqsadida «Karera va bandlik markazi» faoliyat olib boradi. Ushbu markaz ish beruvchi tashkilot, korxona va muassasalar bilan talabalarning uchrashuvlarini tashkillashtirib kelmoqda. Markaz tomonidan so‘nggi 2 yilda 8000 dan ortiq talabalarga munosib ish o‘rinlarini topishlariga ko‘maklashilgan.
Bugungi «Karera kuni» mehnat yarmarkasi ham shunday tadbirlarning ramziy davomi sifatida tashkil etilib, unda ish izlayotgan 10000 ga yaqin talabalar ishtirok etdi.
Tadbirda ish beruvchi korxona va tashkilotlar mas’ul hodimlari o‘z faoliyatini yorituvchi ko‘rgazmali jihozlar va bo‘sh ish o‘rinlari to‘g‘risidagi ma’lumotlar bilan qatnashib, talabalar orasida ishga qabul qilish bo‘yicha tanlovlar o‘tkazdi.
Mazkur tadbirda talabalar va universitet bitiruvchilari ishga joylashish borasida o‘zlarini qiziqtirgan savollarga javob topishdi, xususan, ish beruvchi korxona yoki tashkilotdagi mavjud vakant o‘rinlar, u yerdagi mehnat va maishiy-madaniy shart-sharoitlar, ish haqi miqdorlari haqidagi ma’lumotlar bilan tanishish imkoniyati ega bo‘lishdi.
O‘z navbatida tadbirda qatnashgan korxona va tashkilotlar ham talabalar bilan bevosita suhbat o‘tkazish, o‘zlariga zarur bo‘lgan kadrlarni tanlab olish va o‘zaro manfaatli shartnomalar hamda kelishuvlar rasmiylashtirish imkoniyatiga ega bo‘lishdi.
Hozirgi kunda universitetda matematika-fizika, kimyo-biologiya, ekologiya, ijtimoiy fanlar, tarix, sotsiologiya, psixologiya va boshqa yo‘nalishlarda mutaxassislar tayyorlanmoqda.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter