Jinoyatchilar 2016-yili o‘zbekistonlik va qirg‘izistonlik 16 nafar fuqaroni, ularning pasportini olib qo‘ygan holda, tekstil fabrikasida majburlab ishlatishgan.

Uch nafar buryatiyalik va bir nafar O‘zbekiston fuqarosi (ayol kishi) bu qilmishi uchun sud oldida javob bermoqda. Bu haqida Buryatiya prokuraturasi matbuot xizmatiga tayanib «Sputnik» xabar berdi.

Guruh a’zolari xorijliklarni Rossiya hududida noqonuniy ushlab turish va ulardan majburiy mehnatda foydalanganlikda ayblanmoqda.

Tergovda aniqlanishicha, jinoiy guruh a’zolari 2015-yili 11 nafar xorijlikni Rossiya hududiga noqonuniy kirib kelishini tashkil etgan va ularni Pribaykal rayonidagi Turuntayevo qishlog‘ida joylashgan ishlab chiqarish bazalarining xo‘jalik inshootlariga joylashtirishgan.

2016-yilning martidan to iyuliga qadar ushbu guruh a’zolari o‘sha inshootlarda O‘zbekiston va Qirg‘izistonning 16 nafar fuqarosini, ularning pasportini olib qo‘ygan holda, noqonuniy ushlab turishgan. Jinoyatchilar ularni faqat yegulik evaziga tekstil fabrikasida ishlashga majburlashgan, turli qiynoq, psixologik va jismoniy zo‘rlik ishlatishgan.

Buryatiya Respublikasining Pribaykal rayoni sudi mazkur jinoiy ish materiallarini yaqin vaqt ichida ko‘rib chiqadi.