Saudiya Arabistoni Tashqi ishlar vazirligi AQSh Davlat departamentidan AQShning Isroildagi elchisi Mayk Xakabining yahudiy davlatining deyarli butun Yaqin Sharqqa bo‘lgan huquqi haqidagi bayonoti yuzasidan Qo‘shma Shtatlar pozitsiyasini tushuntirishni talab qildi.

Juma kuni Xakabi amerikalik jurnalist Taker Karlsonga bergan intervyusida Isroil Misrdagi Nil daryosi va Suriya va Iroqdagi Frot daryosi o‘rtasidagi yerlarga Bibliya huquqi borligini aytdi.

BAA, Misr, Iordaniya, Indoneziya, Pokiston, Turkiya, Qatar, Kuvayt, O‘mon, Bahrayn, Livan, Suriya va Falastin tashqi ishlar vazirliklari, shuningdek, IHT, ADL va KShHK kotibiyatlari allaqachon bu so‘zlarni keskin qoralab, chuqur tashvish bildirgan.

"Podshohlik xalqaro huquq, BMT Nizomi va o‘rnatilgan diplomatik me’yorlarning buzilishi bo‘lgan ushbu mas’uliyatsiz e’tirozlarni qat’iyan rad etishini tasdiqlaydi," - deyiladi vazirlikning X ijtimoiy tarmog‘idagi bayonotida.

TIVning qayd etishicha, bunday bayonotlar xavfli pretsedent yaratadi, ayniqsa, ular AQSh rasmiysi tomonidan aytilganini hisobga olinsa.

"Bunday fikrlar mintaqa davlatlari va AQSh o‘rtasida shakllangan ajoyib munosabatlarga e’tiborsizlikni aks ettiradi. Davlat departamenti bunday ritorikaga nisbatan o‘z pozitsiyasini tushuntirishi kerak," - deya ta’kidladi Saudiya Arabistoni vazirligi.

Ma’lumot uchun: “Nildan Frotgacha” (inglizcha: from the Nile to the Euphrates) iborasi Bibliyadagi Ibrohimga berilgan va’daga oid geografik formuladan kelib chiqqan. U aniq siyosiy chegaralarni emas, balki juda keng hududni anglatadi. Turli talqinlarga ko‘ra, bu ibora Misrdan tortib Levant va Mesopotamiyagacha bo‘lgan hududlarni, ya’ni bugungi Misr, Isroil, Falastin, Iordaniya, Livan, Suriya va Iroqning ayrim qismlarini qamrab olishi mumkin.