Toshkentning Sergeli tumanidagi omborxonada tunda kuchli portlash ro‘y berdi va katta yong‘in sodir bo‘ldi. Hodisa oqibatida jabrlanganlar bor.

Dastlabki rasmiy xabar

FVV Sergeli tumanida sodir bo‘lgan portlash haqida dastlabki ma’lumotni berdi

Bugun, 28 sentyabr kuni soat 02:43 da Toshkent shahar Sergeli tumani "Quruvchilar" dahasida joylashgan omborxonalarning birida kuchli chaqnash oqibatida yong‘in sodir bo‘lganligi to‘g‘risida FVBga xabar tushgan.

Shunga ko‘ra, 16 ta yong‘in-qutqaruv ekipaji va  3 ta avtonarvon soat 02:48 da hodisa ro‘y bergan hududga yetib borib, hozirda  yong‘inni o‘chirish ishlari amalga oshirilmoqda.

Yong‘in oqibatida fuqarolarni tan jarohati olish va halok bo‘lish holatlari bo‘yicha hozircha ma’lumot kelib tushmadi.

Hodisa yuzasidan qo‘shimcha ma’lumot taqdim etiladi, deyiladi FVV xabarida.

SSV xabari

Bugun, 28 sentyabr kuni soat 02:43 da Toshkent shahar Sergeli tumani "Quruvchilar" dahasida joylashgan omborxonalarning birida kuchli chaqnash oqibatida yong‘in sodir bo‘lgan.

Ushbu yong‘in oqibatida jarohatlanganlar Respublika shoshilinch tibbiy yordam ilmiy markazi va uning Toshkent viloyat filialiga olib kelingan.

Hozirga qadar ular orasida o‘ta og‘ir tan jarohati olganlar yo‘q. Ayni paytda shifokorlar tomonidan jabrlanganlarga barcha kerakli tibbiy yordam ko‘rsatilmoqda.

Davolash muassasalarida tezkor tibbiy yordam ko‘rsatish uchun shifokorlarimiz va barcha zarur dori-darmon zahirasi yaratilgan.  Yong‘in oqibatida voqea joyi va uning atrofidagi xonadonlarda jarohatlanganlarga ham shoshilinch tibbiy yordam ko‘rsatilmoqda.

Hodisa yuzasidan qo‘shimcha ma’lumot taqdim etiladi, deyiladi Sog‘liqni saqlash vazirligi xabarida.

IIV xabari

Joriy yilning 28 sentyabr kuni soat 03:00da FVV Toshkent shahar Boshqarmasi navbatchilik qismidan tushgan xabarga ko‘ra, Sergeli tumani “Qipchoq” ko‘chasida joylashgan “Inter Logistika” MChJga tegishli omborxonada chaqnash oqibatida yong‘in kelib chiqqan. Yong‘in maydoni hamda jabrlanuvchilar soni haqidagi ma’lumotlarni aniqlash choralari ko‘rilmoqda.

Hodisa sodir bo‘lgan joyda Toshkent shahar IIBB hamda  sohaviy xizmat xodimlarining shaxsiy tarkibi, FVVning 12 ta avtotsisterna va 4 ta maxsus jihozlangan avtomashinasi, tez-tibbiy yordam xodimlari ishlamoqda.

Holat yuzasidan qo‘shimcha axborot beriladi, deyiladi IIV axborot xizmati xabarida.

FVV qo‘shimcha xabari

FVV xodimlari tomonidan yong‘inni o‘chirish ishlari davom etmoqda. Vaziyat to‘liq nazoratga olingan.

Yong‘in soat 05:02 da qurshab olingan. FVV xodimlarining tezkor harakatlari natijasida yong‘in maydoni qisqartirilib borilmoqda.

Voqea joyida dastlabki daqiqalardan boshlab FVV rahbariyati hamda kuch va vositalari, shuningdek, tegishli tashkilotlar xodimlari ish olib bormoqda.

Yong‘in kelib chiqish sababini aniqlash maqsadida FVVning maxsus laboratoriyasi hodisa joyida ish olib bormoqda. Voqea joyida FVV rahbarligida shtab tashkil etilgan.

Atrofdagi xonadonlar zarar ko‘rgan

Ijtimoiy tarmoqlarda tarqalgan videolarda uy va boshqa ob’yektlarga jiddiy zarar yetganini ko‘rish mumkin.