Xolesterin miqdorini muntazam nazorat qilish yurak kasalliklari va qon tomirlari tiqilib qolish xavfini kamaytirishga yordam beradi. Yuqori xolesterin darajasi odatda o‘zini hech qanday namoyon qilmaydi va aksariyat hollarda favqulodda vaziyatlardagina bunga e’tibor berishadi, deb yozadi Daily Expess.

Organizmdagi yuqori xolesterinning eng kam ma’lum bo‘lgan ikki belgisi — bu boshning orqa qismida, ensada tez-tez bosh og‘rig‘i va qo‘l yoki oyoqlardagi og‘riq. Medicover Hospitals klinikasi shifokorlarining fikriga ko‘ra, bosh og‘rig‘i bosh atrofidagi qon tomirlarining tiqilib qolishidan kelib chiqadi:

«Bu qon tomirlari xolesterin moddalari bilan tiqilib qolganda sodir bo‘ladi. Agar bu to‘xtatilmasa, qon tomirlari yorilib, insultni keltirib chiqarishi mumkin».

Shuningdek, xolesterin to‘planishi oyoq va qo‘llardagi qon tomirlarini to‘sib qo‘yishi va vaqti-vaqti bilan og‘riq yoki sanchiq hissiga sabab bo‘lishi mumkin. Bu xolesterin miqdori halokatli darajada yuqori ekanligidan dalolat beradi.

«Yaxshi xolesterin» deb nomlanuvchisi yuqori zichlikdagi lipoprotein bo‘lgani uchun shunday ataladi. Ular qon tomir devorlaridan xolesterinni yo‘qotib, tomirlarni «tozalaydi».

Yomon xolesterin esa tomirlar devorlarida to‘planib, tiqin hosil qilishi, ateroskleroz, tromboz keltirib chiqarishi, qon tomirlari, yurak xurujlarini qo‘zg‘atishi mumkin. Xolesterin miqdorini aniqlashning yagona usuli — qon tahlili.

Britaniya yurak fondi (BHF) yuqori xolesterinning oldini olish uchun to‘yingan yog‘ miqdori yuqori bo‘lgan mahsulotlar: pirog, qovurilgan taomlar, kolbasa va yog‘li go‘sht, sariyog‘dan saqlanish kerakligini aytdi.

Buning o‘rniga O‘rta yer dengizi uslubidagi parhezga amal qilish, ya’ni don, meva-sabzavot va baliqni ko‘proq, go‘shtni esa kamroq iste’mol qilish kerak.