Texnologiya olamida kutilgan tarixiy burilish yuz berdi. Google kompaniyasi Android ilovalar bozoridagi ko‘p yillik monopoliyasiga chek qo‘yib, dasturchilarga Google Play to‘lov tizimini chetlab o‘tish imkoniyatini taqdim etdi. Mazkur qaror nafaqat raqamli bozor erkinligini ta’minlaydi, balki ilova yaratuvchilari uchun moliyaviy yuklarni sezilarli darajada kamaytiradi.

Yangi qoidalar va muqobil to‘lov tizimlarini joriy etish dasturi dunyo bo‘ylab bir necha bosqichda amalga oshiriladi. Bugungi kunda mazkur funksiyadan AQSh, Buyuk Britaniya va Yevropa Ittifoqi mamlakatlaridagi dasturchilar va foydalanuvchilar to‘liq foydalanish imkoniyatiga ega.

Reyters va sohaviy nashrlarning Google rasmiy bayonotiga tayanib bergan xabariga ko‘ra, kengayish geografiyasi quyidagi grafiklar asosida davom etadi:

• 2026-yil 30-sentyabrdan Avstraliya hududida;
• 2026-yil 31-dekabrdan Yaponiya va Janubiy Koreya bozorlarida;
• 2027-yilning sentyabriga qadar Dunyoning qolgan barcha hududlari va global bozorda to‘liq ishga tushiriladi.

Bu degani, tez orada dunyoning istalgan nuqtasidagi Android foydalanuvchilari ilova ichidagi xaridlarni bevosita dasturchining shaxsiy veb-sayti yoki boshqa mustaqil to‘lov tizimlari orqali amalga oshirishlari mumkin bo‘ladi.

Yangi tizimning eng katta afzalligi uzoq yillardan beri dasturchilarning noroziligiga sabab bo‘lib kelgan 30 foizlik majburiy komissiya stavkasining bekor qilinishidir. Google kompaniyasi dasturchilar uchun xizmat haqi ulushini tubdan kamaytirishga qaror qildi.

Yiliga 1 million AQSh dollaridan kam daromad topadigan dasturchilar va startaplar uchun kompaniyaga to‘lanadigan odatdagi 30 foizlik an’anaviy ulush o‘rniga atigi 10 foizlik bazaviy komissiya stavkasi belgilandi.

Shuningdek, moliyaviy shartlarda yangi taqsimot joriy etilmoqda. Agar ilova egasi to‘lovlarni qabul qilishda baribir Google Playning o‘z tizimidan foydalanishni afzal ko‘rsa, u holda xavfsizlik va tranzaksiyalarni boshqarish uchun qo‘shimcha 5 foizlik to‘lov undiriladi. Ammo dasturchi foydalanuvchini o‘z veb-saytiga yo‘naltirsa yoki muqobil tizimlarni integratsiya qilsa, ushbu qo‘shimcha 5 foizlik to‘lovdan butunlay ozod etiladi.

Epic Games va boshqa yirik texnologiya kompaniyalarining Google ustidan olib borgan ko‘p yillik sud jarayonlari ushbu ijobiy natijaning asosiy turtkisi bo‘ldi. Mutaxassislarning fikricha, Google Play siyosatidagi bunday ochiqlik ilovalar bozorida sog‘lom raqobatni kuchaytiradi, raqamli mahsulotlarning narxi arzonlashishiga olib keladi va kichik dasturchilarga o‘z daromadlarining katta qismini saqlab qolish imkoniyatini beradi.