Buyuk Britaniyada 2009-yil 1-yanvardan keyin tug‘ilganlar uchun sigareta va veyplarni sotib olish umrbod taqiqlanadi. Bu haqda The Guardian xabar berdi.

Mamlakat parlamenti 2026-yil 21-aprel kuni «Tamaki va veyplar to‘g‘risida»gi («Tobacco and Vapes Bill») tarixiy qonunni yakuniy bosqichda tasdiqladi. Ushbu qonun mamlakatda «chekishdan xoli avlod» yaratishga qaratilgan.

Qonunga ko‘ra:

2009-yil 1-yanvarda yoki undan keyin tug‘ilgan har qanday shaxsga (hozirda 17 yosh va undan kichik bo‘lganlar) Buyuk Britaniya hududida tamaki mahsulotlarini sotish umrbod taqiqlanadi.

Sigareta sotib olish uchun belgilangan yosh chegarasi (hozirda 18 yosh) har yili bir yilga oshib boradi. Bu degani, taqiq ostiga tushgan avlod vakillari hech qachon qonuniy ravishda tamaki sotib olish yoshiga yetmaydilar.

Qonun nafaqat sigaretalarni, balki veyplarni ham qamrab oladi. Hukumat bolalarni jalb qilmaslik uchun veyplarning ta’mlari, qadoqlari va do‘konlardagi reklamalarini cheklash bo‘yicha yangi vakolatlarga ega bo‘ldi.

Voyaga yetmaganlarga tamaki yoki veyp sotgan do‘kondorlarga joyida 100 funt sterling miqdorida jarima solinadi, takroriy qoidabuzarliklar uchun esa sud orqali kattaroq jarimalar belgilanishi mumkin.

Qonun loyihasi Britaniya parlamentining ikkala palatasi tomonidan ma’qullangan va yaqin kunlarda Qirol Charlz III tomonidan imzolanganidan so‘ng rasmiy kuchga kiradi. Cheklovlarning amalda ijro etilishi 2027-yildan boshlanishi kutilmoqda.