Браун университетида содир этилган қуролли ҳужум ортидан АҚШ маъмурияти «Грин карта» (Diversity Lottery (DV1) иммиграция дастурини тўхтатиш бўйича қарор қабул қилди. Бу ҳақда АҚШ ички хавфсизлик вазири Кристи Ноэмнинг расмий баёнотида маълум қилинган.

Маълум қилинишича, ҳужумни содир этган шахс – Клаудио Мануэль Невес Валенте АҚШга 2017 йилда айнан DV1 иммиграция визаси орқали кириб келган ва грин-карта олган. Баёнотда у «мамлакатга киришига умуман йўл қўйилмаслиги керак бўлган шахс» сифатида баҳоланган.

Қайд этилишича, 2017 йилдаёқ Дональд Трамп президентлиги даврида ушбу дастурни бекор қилиш масаласи кўтарилган эди. Бунга сабаб сифатида Нью-Йоркда содир этилган теракт мисол қилиб келтирилган: ўшанда ИШИД аъзоси бўлган шахс ҳам DV1 дастури орқали АҚШга кириб келиб, юк машинаси билан одамларни босиб кетган ва саккиз киши ҳалок бўлган эди.

Баёнотда таъкидланишича, президент Трамп кўрсатмасига мувофиқ, АҚШ Фуқаролик ва иммиграция хизмати (USCIS)га Грин карта дастурини зудлик билан тўхтатиш топширилган. Қарордан кўзланган асосий мақсад — «бу дастур орқали келиши мумкин бўлган хавфларни бартараф этиш ва АҚШ фуқароларининг хавфсизлигини таъминлаш».

Расмийлар фикрича, DV1 дастури миллий хавфсизликка жиддий таҳдид солиши мумкин ва уни қайта кўриб чиқиш ёки бутунлай бекор қилиш масаласи кун тартибида қолмоқда.