Дональд Трамп ўзининг махсус вакили Стив Уиткофф ва куёви Жаред Кушнернинг Москвада Владимир Путин билан учрашувини шарҳлаб чиқди.

Трампнинг айтишича, уларнинг Путин билан учрашуви «жуда яхши» ўтган.

«Лекин бу учрашувдан нима чиқишини айта олмайман – тангода рақс тушиш учун икки киши керак», – дейди Трамп.

У, шунингдек Путин урушни тугатмоқчи экани, «оддий ҳаётга қайтиш»ни ва АҚШ билан савдо қилишни истаётганини қўшимча қилган.

Трамп Украина ҳақида тўхталиб, Зеленскийда олдин ҳам, ҳозир ҳам урушда ютиб берадиган «козир» йўқлигини, урушнинг аввали келишув учун анча қулай пайт бўлганини айтди.

«Улар ўша пайтда рад этишди. Энди эса уларга қарши ишлатилиши мумкин бўлган жуда кўп нарсалар бор», – деди Трамп.

Бу орқали Трамп Украина музокараларда мустахкам позицияга эга эмас, деган фикрни қайта такрорлади.

Трамп маъмуриятидан олинган маълумотларга кўра, 4 декабр куни Майамида музокараларнинг янги раунди бошланади. Унда Уиткофф ва Кушнер Украина делегацияси раҳбари Рустем Умеров билан учрашади. Умеров Майамига расман таклиф қилинган. Бу маълумотни Украина элчихонасининг АҚШдаги вакили Олга Стефанишина ҳам тасдиқлаган.

Бу учрашув АҚШ–Россия–Украина ўртасидаги сўнгги кунлардаги фаол дипломатик ҳаракатлар давомидир.