АҚШ Конгресси Вакиллар палатасининг назорат қўмитаси 26–27 февраль кунлари Нью-Йорк штати Чаппакуа шаҳрида ёпиқ форматда йиғилиш ўтказди. Унда АҚШнинг 42-президенти Билл Клинтон ва собиқ давлат котиби Ҳиллари Клинтон Жеффри Эпштейин иши доирасида баёнот берди. Иккиси ҳам ўз кириш сўзлари матнини эълон қилди.

Билл Клинтоннинг таъкидлашича, унинг Эпштейн билан қисқа танишуви жиноятлар ҳақида маълумотлар ошкор бўлишидан анча олдин тугаган.

У ўз нутқида Эпштейннинг жиноятлари ҳақида билмаганини, ҳеч қачон шубҳали ҳаракатларга гувоҳ бўлмаганини ҳамда ўзини айбловчи суратлар мавжуд бўлса ҳам, бу унинг ноқонуний иш қилганини англатмаслигини айтди.

Клинтоннинг сўзларига кўра, агар Эпштейн ноқонуний иш қилаётганини сезганида, у билан алоқани дарҳол узган ва уни ҳуқуқ-тартибот идораларига топширган бўлар эди. Унинг айтишича, 2008 йилга келиб, Эпштейн жиноятлари фош этилган пайтда улар аллақачон алоқа қилмас эди.

Ҳиллари Клинтон ҳам Эпштейн ва унинг яқин ҳамкори Гислайн Максвелл жиноятлари ҳақида билмаганини билдирди.

Унинг таъкидлашича, у Эпштейн билан учрашмаган ва унинг самолётида учмаган. Эпштейннинг хусусий оролида ҳам бўлмаган.

Клинтон Конгресс текширувини «сиёсий театр» деб атаб, айрим сиёсатчиларни эътиборни бошқа шахслардан чалғитишда айблади. У инсон савдоси ва аёллар ҳамда қизларга қарши зўравонликка қарши кураш бутун дунё миқёсидаги муаммо эканини қайд этди.

Шунингдек, у тергов доирасидаги айрим масалалар, жумладан, собиқ президент Трамп билан боғлиқ эҳтимолий ҳолатлар тўлиқ ўрганилмаётганини танқид қилди.

Йиғилиш ёпиқ тарзда ўтган бўлса-да, икки томон ҳам ўз позициясини оммавий баёнот орқали эълон қилди.