Японияда Паркинсон касаллигини даволаш учун индукцияланган плюрипотент илдиз ҳужайралари (iPS-ҳужайралар) асосида ишлаб чиқилган дори воситасидан фойдаланишга қисман рухсат берилди. Бу ҳақда Киото университети қошидаги iPS-ҳужайраларни тадқиқ этиш ва қўллаш институти хабар берди.

Институт директори Дзюн Такахаси буни тиббиётдаги «улкан қадам» деб атаб, ушбу даволаш усули тез орада ишончли стандартга айланиши учун муассаса бор кучини сафарбар қилишини таъкидлади.

Ишлаб чиқилган дори воситаси iPS-ҳужайраларидан етиштирилган асаб ҳужайраларини ўз ичига олади. Улар Паркинсон касаллигига чалинган беморнинг миясига трансплантация қилинади.

2024 йил апрел ойида ўтказилган синовлар беморларнинг аҳволида ижобий ўзгаришлар борлигини кўрсатди.

Дорини ишлаб чиқарувчи Sumitomo Pharma компанияси ушбу маҳсулотни Amshepuri савдо белгиси остида рўйхатдан ўтказиш учун ариза берган ва у тезлаштирилган тартибда кўриб чиқилган. Бундан ташқари, худди шундай ҳужайралар асосида ишлаб чиқилган ишемик кардиомиопатия (юрак касаллиги)ни даволовчи дори ҳам қисман маъқулланган. Ҳар икки дори воситаси ҳозирча дунёда ягона ва ўхшаши йўқ, дейилади хабарда.