Жорий йил 16 октябрь куни бўлиб ўтган Трамп ва Путин ўртасидаги телефон мулоқотидан сўнг, АҚШ президенти икки раҳбарнинг Будапештда икки ҳафта ичида учрашишини эълон қилган эди.

Бироқ, Financial Times нашри манбаларига кўра, ушбу суҳбатдан бир неча кун ўтиб, Россия Ташқи ишлар вазирлиги Вашингтонга меморандум юборган. Унда Москва Украинадаги урушнинг «асосий сабабларини бартараф этиш» талабини илгари сурган. Хусусан, Россия томони Киевдан қуйидагиларни талаб қилган:

• ҳудудий имтиёзлар беришни;
• Украина қуролли кучларини қисқартиришни;
• мамлакат ҳеч қачон НАТОга қўшилмаслигига кафолат беришни.

Шундан сўнг АҚШ давлат котиби Марко Рубио ва Россия Ташқи ишлар вазири Сергей Лавров телефон орқали суҳбатлашган. Манбаларга кўра, Рубио Трампга Москва музокараларга тайёр эмаслигини айтган.

Бошқа манбанинг сўзларига кўра, Трамп Москванинг позициясидан кўнгли тўлмаган, шунингдек, Лавровнинг муросасиз муносабати Вашингтонда шубҳа уйғотган.

АҚШ, айниқса, Лавровнинг сентябрь ойида Нью-Йоркда Рубио билан бўлган қисқа учрашувда айтган гапларидан сўнг музокаралар фойдали бўлишига ишонмай қўйган. Лавров ўшанда Россия «Украина нацистлар қўлида» деган иддаода эканлигини қайд этган.