Германия канцлери Фридрих Мерц Sat1 телеканалига берган интервьюсида Россия президенти Владимир Путинни “ҳозирги даврнинг энг хавфли ҳарбий жиноятчиси” деб атади. Олмон раҳбари фикрича, Путин ҳозирча Украинадаги урушни тўхтатиб, тинчлик битими тузиш ниятидан йироқ.

“Биз бунинг учун (Украинада урушни тўхтатиш ва тинчлик битими тузиш назарда тутилмоқда – таҳр.) замин ҳозирлашимиз керак. Ҳарбий жабҳада бу мушкул вазифа, аммо иқтисодий йўналишда имкониятлар мавжуд”, – дея Россияни иқтисодий-молиявий жиҳатдан ҳолдан тойдиришни таклиф этган Фридрих Мерц.

Россия иқтисодиётига тўсиқ қўйиш йўли сифатида Москва билан савдо-сотиқни давом эттираётган мамлакатларга бож жорий этиш кўрсатилган.

Германия канцлери Путиннинг Украина билан тинчлик битими тузиш борасида баёнотларига ишонмаслик ва музокараларда Кремлга ён бермаслик кераклигини таъкидлаган.

Путин Мерцнинг ўта кескин баёнотига жавоб бераркан, Германия канцлерини жанговар ҳаракатлар учун жавобгарликни Москва гарданига юклашга уринишда айблаган.

Маълумки, Россия президенти Украинадаги уруш учун Ғарб ҳамжамияти айбдор эканини иддао қилиб келади.

Россия армияси 2022 йилнинг 24 февралида Украина ҳудудига бостириб кирганидан буён расмий Берлин агрессияни кескин қоралаб келмоқда. Жумладан, 2022 йил апрель ойида Германия президенти Франк-Вальтер Штайнмайер Путин ҳарбий жиноятлари учун маҳкама қаршисида жавоб бериши кераклигини таъкидлаган, россиялик ҳамкасбини “уруш оловини ёқаётган бункердаги шахс” деб атаган эди.

2021 йилнинг март ойида АҚШнинг ўша вақтдаги президенти Жо Байден журналистнинг “Путинни қотил дея ҳисоблайсизми?” деган саволига “ҳа” дея жавоб берган, бу эса Россия сиёсий доиралари ғазабини қўзғаган эди.

Байден 2022 йилда Путинни “ҳарбий жиноятчи” деб атагани ҳам маълум.

Эслатиб ўтамиз, 2023 йил 17 март куни Ҳаагада жойлашган Халқаро жиноий суд Россия президенти Владимир Путинни ҳибсга олишга ордер берганди.