Президент Владимир Путин ёш тадбиркорлар ва кашшофлар билан учрашувда Россиянинг Украина босқинидан нимани кўзлаганига ойдинлик киритди. У нутқи давомида ўзини император Пётр Биринчига тенглаштирган.

«Бугун Пётр Биринчининг 350 йиллигига бағишланган кўргазмада қатнашдик. Ҳайратланарли жиҳати, ўшандан буён деярли ҳеч нарса ўзгармаган. Пётр Биринчи Шимолий урушни 21 йил давомида олиб борди. Бир қарашда у Швеция билан урушган, ҳудудларни босиб олган. Йўқ, у босиб олмаган, балки қайтариб олган! Худди шундай! У Петербургга – янги пойтахтга асос солганида бирор бир Европа давлат уни Россия ҳудуди ўлароқ тан олмаган, Швецияники деб билишган. Ҳолбуки, у ерда асрлар давомида финн-угор халқлари билан биргаликда славянлар ҳам яшаган, ҳудуд эса Русия давлати назоратида бўлган», – деган Путин.

Россия раҳбари нутқи давомида Украина босқинини тилга олмаган, аммо қўшни давлатга уруш очишдан мақсад худди Пётр Биринчи каби тарихий ерларни қайтариб олиш эканига ишора қилган.

«Кўриниб турибдики, бизнинг гарданимизга ҳам (ерларни) қайтариб олиш ва мустаҳкамлаш тушган», – деган у.

Таҳлилчилар Россия раҳбарининг ҳудудий даъволарини хавфли тенденция деб баҳоламоқда. Айни пайтда Украинанинг рус қўшини томонидан босиб олинган вилоятларида Россияга қўшилиш борасида референдум ўтказилиши айтилмоқда. Бу эса ерларни зўрлик йўли билан босиб олишдек ўтмишга айланган ҳодиса яна қайтаётганидан далолат бермоқда.

Сир эмас, В.Путин СССРнинг парчаланишини XX асрнинг йирик геосиёсий фожиаси деб билади.

2021 йил 1 сентябрь куни Владивостокда мактаб ўқувчилари билан учрашувда ҳам у собиқ Иттифоқнинг парчаланишини мамлакат давлатчилиги тарихидаги фожиа деб атаган.

«Ушбу фожиалар рўй бермаганда (1917 йилги революция ва қизил империянинг парчаланишини назарда тутилмоқда – таҳр.), аҳоли 500 млн атрофида бўлар эди. Фарқни кўряпсизми? Давлатнинг ялпи қудрати геометрик прогрессия тартибида ошар эди», – деган у.

Россия раҳбари СССР борасида аввал ҳам баҳсли баёнотлар берган. Хусусан, 2020 йилда «Россия. Кремль. Путин» номли ҳужжатли фильм учун берган интервьюсида СССР таркибида бўлган республикалар Иттифоқ таркибидан чиқиш пайти ўзи билан Россияга тегишли улкан ҳудудларни ҳам олиб чиқиб кетганини даъво қилган. Cиёсий таҳлилчилар бу ўринда В.Путин Украина ва Қозоғистонни назарда тутганини айтган. Россиялик таниқли олим, тарих фанлари доктори Сергей Абашин «Россияга азалдан тегишли бўлган ҳудудлар бошқа давлатларга ўтиб кетгани»га илмий раддия берган.

Кремль соҳибининг 2021 йил 12 июль куни эълон қилинган «Руслар ва украинларнинг тарихан бирлиги ҳақида» деб номланган мақоласи ҳам қизғин баҳсларга сабаб бўлди. Рус ва украин тилида эълон қилинган мақолада муаллиф замонавий Украинанинг ташкил топиши СССР даври маҳсули эканини таъкидлайди. Мақолада, шунингдек, большевиклар чегараларни ўзбилармонлик билан ўзгартириб, Россия ҳудудини бошқаларга туҳфа қилиб юборгани, ҳудудлар талон-торож этилгани даъво қилинади.