Россия ташқи ишлар вазири Сергей Лавров Украина 28-29 декабрга ўтар кечаси Новгород вилоятида президент Путиннинг қароргоҳига дронлардан ҳужум қилганини эълон қилди.

У буни террористик ҳужум деб атади ва барча дронлар йўқ қилинганини ва ҳеч ким қурбон бўлмаганини таъкидлади.

«Бундай ҳаракатлар жавобсиз қолмайди. Россия Қуролли Кучлари жавоб зарбалари учун нишонларни ва уларни амалга ошириш вақтини аниқлаб олди», деди Лавров.

Унинг қўшимча қилишича, Россия Қўшма Штатлар билан музокаралардан чиқиш ниятида эмас. Бироқ, воқеани инобатга олган ҳолда, «Россиянинг музокара позицияси қайта кўриб чиқилади».

Украина етакчиси Владимир Зеленский бу воқеани тинчлик музокараларида эришилган барча ютуқларга путур етказишга қаратилган сохта (фейк) хабар деб атади. Унинг таъкидлашича, бу Украинага, хусусан, Киевга қилинган зарбаларни оқлаш ва урушни тугатиш учун зарур чораларни кўрмаслик учун қилинган.

Айни пайтда, Трамп ва Путин бугун телефон орқали гаплашдилар. Россия президенти ёрдамчиси Юрий Ушаков ушбу суҳбат мазмунини баён қилиб, Америка томони Россия президентига кеча Мар-а-Лагода Украина делегацияси билан бўлиб ўтган музокаралар натижалари ҳақида батафсил маълумот берганини маълум қилди.

Шунингдек, Ушаковнинг сўзларига кўра, Путин Трампга Новгород қароргоҳига қилинган ҳужум ҳақида гапириб берган.

«АҚШ президенти бу янгиликдан ҳайратда қолди, том маънода ғазабланди. У бундай ақлдан озган ҳаракатларни тасаввур ҳам қила олмаслигини айтди. Бу шубҳасиз Зеленский билан ишлаш контекстида Америка ёндашувига таъсир қилади. Унга Трампнинг ўзи айтганидек, худога шукурки Tomahawk ракеталари бермади», дейилади Кремлнинг расмий баёнотида.

Америка томони ҳали тафсилотларга тўхталмаган. Оқ уй матбуот котиби Кэролин Левитт фақат суҳбат Украинага тегишли эканлигини ва «ижобий руҳда» бўлганини айтди.