Россия Украина ҳудудига қитъалараро баллистик ракеталарида зарба берди. Бу ҳақда Украина Қуролли кучлари маълум қилди.

Украина ҳарбий идораси ракеталар Астрахан ҳудудидан учирилганини айтган, бироқ қолган тафсилотларни келтирмаган. The Guardian нашрининг ёзишича, ушбу маълумотлар тасдиқланса, бу Россия-Украина уруши бошланганидан буён қитъалараро баллистик ракетанинг илк қўлланиши бўлади.

Мазкур турдаги ракеталарнинг энг қисқа учиш масофаси 5 минг километр бўлиб, айримларида бу кўрсаткич 9 минг километрдан кўпроқни ҳам ташкил қилади.

Украина Ҳарбий ҳаво кучлари, шунингдек, бугун, 21 ноябрь куни эрталаб русларнинг 6 та X-101 қанотли ракетасини уриб туширганини эълон қилди. Бироқ идора қитъалараро баллистик ракета келтириб чиқарган зарарлар ҳақида маълумот бермади.

Кеча Украина илк марта Россиянинг Курск вилоятига британиянинг Storm Shadow/SCALP-EG ракеталарини учирган эди.

Эслатиб ўтамиз, 20 ноябрь куни айрим давлатлар Киевдаги элчихоналарини эҳтимолий ҳаво ҳужумлари сабаб бир кунга ёпганини эълон қилган эди.