Хабарлар тезкор Телеграм каналимизда Обуна бўлиш ×

«Россияга тегишли дея даъво қилинаётган ҳудудлар аслида босиб олинган». Таниқли олим президент Путинга кескин эътироз билдирди

«Россияга тегишли дея даъво қилинаётган ҳудудлар аслида босиб олинган». Таниқли олим президент Путинга кескин эътироз билдирди

«Россия. Кремль. Путин» фильмидан скриншот

Россиялик таниқли олим, тарих фанлари доктори Сергей Абашин президент Владимир Путиннинг «Россия. Кремль. Путин» номли ҳужжатли фильмда билдирган мулоҳазаларига кескин эътироз билдирди.

В.Путин мазкур фильм давомида Россияга азалдан тегишли бўлган ҳудудлар бошқа давлатларга ўтиб кетганидан гап очган.

«Унга (президент Путин назарда тутилмоқда – таҳр.) «азалий ҳудудлар» бўлмаслигини тушунтирадиган мард борми! Барча ҳудудлар тарихнинг турли даврида турфа қабила ва халқлар томонидан бир-бирининг ўрнини эгаллаш, ҳижрат қилиш ҳамда босиб олиш орқали забт этилган. У «азалий» деб атаётган Московия, кейинроқ Русия империясининг ерлари ҳам қачондир босиб олинган ва мустамлака қилинган, маҳаллий аҳоли эса қириб ташланган, бўйсундирилган ёки ассимиляцияга учраган», деб ёзади профессор Абашин.

Олимга кўра, Русия империяси ерлари ҳам, В.Путин таъкидлаётганидек, «рус халқи»га эмас, балки асли-насли олмон миллатига бориб тақалувчи Романовлар хонадонига тегишли бўлган.

«Унга империянинг (Совет иттифоқи назарда тутилмоқда – таҳр.) миллий республикалар ва мухтор ўлкаларга бўлиниши «совға» эмас, балки мураккаб музокаралар ва ўзаро ён бериш, манфаатлар мувозанатини тиклаш йўлидаги изланишлар маҳсулини эканини тушунтирадиган мард борми! Ўшанда тўлақонли «русча» фикрлашдан йироқ бўлган марказ маҳаллий аҳоли кайфияти билан ҳисоблашишга мажбур бўлган, айни чоқда, бунинг эвазига муайян бонусларни қўлга киритган эди», – деб собиқ СССРнинг сиёсий тузилмасини таҳлил қилади олим.

Шу билан бирга, С.Абашин замонавий Россия Федерацияси юридик жиҳатдан Русия империяси ерларига ворис бўла олмаслигини ҳам қайд этади. Негаки, замонавий Россияда оқпошшо давлатидан фарқли ўлароқ ўзгача мафкура, мутлақо бошқача сиёсий ва ҳуқуқий тизим амал қилмоқда. 

Президент Путин «Россия. Кремль. Путин» номли ҳужжатли фильм учун берган интервьюсида СССР таркибида бўлган республикалар Иттифоқ таркибидан чиқиш пайти ўзи билан Россияга тегишли улкан ҳудудларни ҳам олиб чиқиб кетганини даъво қилган.

Cиёсатшунос Камолиддин Раббимов бу ўринда Россия раҳбари Украина ва Қозоғистонни назарда тутаётганини тахмин қилган.

«Путин кечаги интервьюсида қаттиқ важоҳат билан «СССРга кириб, рус ерларини олиб чиқиб кетган» давлатлар ҳақида гапирди. Менимча, у Украина ва Қозоғистонни назарда тутяпти. Яқинда Тўқаев «Евроосиё иқтисодий иттифоқи – фақат иқтисодий лойиҳа, лекин сиёсий эмас» деган эди. Кўриниб турибдики, Путиннинг жаҳли чиқибди. Бу билан Путин Қозоғистон раҳбариятига «Ёки менинг ташаббусларимни миқ этмай қабул қилинглар, ёки аҳволингиз Украинадан ҳам ёмонроқ бўлади» демоқда», – деб ёзади К.Раббимов.

Аввал хабар берганимиздек, Қозоғистон президенти Қосим-Жўмарт Тўқаев Россиянинг «Комсомольская правда» газетасига берган интервьюсида Евроосиё иқтисодий иттифоқи Европа иттифоқи каби сиёсий бирлашма бўла олмаслиги, фақат иқтисодий тузилма бўлиб қолиши лозимлигини таъкидлаган эди.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг