Тараққиётга эришиш, мамлакат гуллаб-яшнаши учун фуқаролар бир-бирига дўстона ва хайрихоҳ муносабатда бўлиши, турли ихтилоф ва зиддиятларга чек қўйиш керак. Бу ҳақда Қозоғистон президенти Қосим-Жўмарт Тўқаев 25 октябрь – Республика куни байрамига бағишланган маросимда гапирган.

«Бошқаларнинг меҳнатини қадрламаслик, ўзгаларнинг фикрини писанд этмаслик, бировларни ёмонотлиқ қилиш – ривожланган, маданий жиҳатдан юксак жамиятларга бегона иллатлардир. Бундай уятли қилмиш учун жамият ва қонун олдида жавоб бермоқ лозим. Интернетда бирор бир мавзуда бошланган муҳокамалар адоқсиз баҳсларга айланиб кетадики, буни жамиятдаги энг хатарли хасталик деб аташ мумкин. Биз бу касалликдан фориғ бўлишимиз керак», – деган Тўқаев.

Қозоғистон раҳбари мамлакат мустақилликка эришган санани «муқаддас кун» деб атаган. У Қозоғистон сўнгги йилларда жамиятнинг ҳаётининг тури жабҳаларида катта ютуқларга эришганини таъкидларкан, мамлакат ўтмиш сабоқларини ҳам унутмаслигини қайд этган.

«Буюк мутафаккир Абиш Кекилбаев «Фақат ўтмишдан сабоқ олиб, келажакка умид боғлаганларгина олдинга силжий олади», деган эди. Биз ҳар бир босқичда миллат тарихида ўчмас из қолдирган барча давлат ва жамоат арбобларига ҳурмат бажо келтирамиз ва уларни ҳеч қачон унутмаймиз. Шу билан бирга, биз келажакка катта умид ва ишонч билан қараймиз ва юксак мақсадлар сари интиламиз», – деган у.

25 октябрь Қозоғистонда Республика куни сифатида байрам қилинади. 1990 йилнинг мазкур санасида Қозоғистон давлат мустақиллиги тўғрисида декларация қабул қилинган эди.

Аввал хабар берганимиздек, Тўқаев мазкур сана муносабати билан қозоғистонликларни табриклади.