АҚШ президенти Доналд Трамп навбатдаги тиббий кўрикдан ўтди. Унинг шахсий шифокори Шон Барбабелла текширув натижаларига кўра президент «соғлиги аъло ҳолатда» эканини маълум қилди. Шу билан бирга, врач Трампга вазн ташлаш ва жисмоний фаолликни ошириш бўйича тавсия берган.

Оқ уй томонидан эълон қилинган тиббий ҳисоботга кўра, ҳозирда Трампнинг вазни 108 килограммни ташкил қилмоқда. Бу бир йил аввалги кўрсаткичдан қарийб 6,5 килограммга кўп. 2025 йилда унинг вазни 101,6 килограмм бўлган.

Шифокорнинг таъкидлашича, Трамп президент ва Қуролли кучлар олий бош қўмондони вазифаларини бажариш учун тўлиқ жисмоний ҳолатга эга. Бироқ профилактика нуқтаи назаридан унга овқатланиш тартибини қайта кўриб чиқиш, кўпроқ ҳаракат қилиш ва соғлом турмуш тарзига эътибор қаратиш тавсия қилинган.

Америка матбуоти Трампнинг вазни ортишини унинг кўп йиллик гастрономик одатлари билан боғламоқда. Хусусан, у гамбургер ва диетик колани яхши кўриши билан танилган. Тиббий маслаҳатлар доирасида унга оз миқдорда аспирин қабул қилиш ҳам тавсия этилган.

Доналд Трампнинг ёши ва соғлиғи мавзуси АҚШ сиёсий майдонида доимий муҳокама қилинадиган масалалардан бири бўлиб келмоқда. У АҚШ тарихида президентлик лавозимига энг катта ёшда киришган сиёсатчи ҳисобланади. 14 июнь куни Трамп 80 ёшни қарши олади.

Тиббий кўрикдан сўнг журналистлар билан мулоқот қилган Трамп текширув «идеал» ўтганини таъкидлаган.