Украина президенти Владимир Зеленский Беларусь раҳбари Александр Лукашенкога қарши санкция жорий этди. Бу қарор Украина миллий хавфсизлик кенгаши ва мудофаа вазирлиги таклифига кўра қабул қилинган.

Лукашенко “украиналикларни ўлдиришга кўмак бериш”да айбланмоқда.

Беларусь раҳбарига нисбатан умумий ҳисобда 17 та, жумладан, маблағларни блоклаш, Украинага киришни ман этиш, савдо, молиявий амалиётлар ва технологияларни беришни тўхтатиш каби чекловлар жорий этилган. Жазо чораларининг бир қисми бутун умр, бир қисми эса 10 йил давомида амал қилади.

“2025 йилнинг иккинчи ярмида россияликлар Беларусь ҳудудида зарбдор дронларни бошқариш учун ретрансляторлар ўрнатди. Бу эса Россия армиясининг шимолий вилоятларимиз бўйлаб – Киевшинадан Волинга қадар зарба бериш имкониятини оширди. Россияликлар минтақаларимиздаги энергетика объектлари ва темирйўлларга Беларусь кўмагисиз бундай ҳужумлар уюштира олмас эди”, – деб ёзди Зеленский Телеграмдаги саҳифасида.

Зеленскийнинг фикрича, Лукашенко шахсий ҳокимиятини мустаҳкамлаш учун Беларусь суверенитетини сотмоқда ва Россияга санкцияларни айланиб ўтишда ёрдам бермоқда.

Украина томонига кўра, Беларусдаги 3000 дан зиёд корхона Россияга ракета ишлаб чиқариш учун эҳтиёт қисмларни етказиб бермоқда. Беларусь, шунингдек, ўз ҳудудида “Орешник” баллистик ракеталарини жойлаштирган. 2025 йилдан Беларусь корхоналари Россияни ушбу қурол учун зарурий компонентлар билан таъминламоқда.   

Маълумот ўрнида: жорий йил 25 январь куни Зеленский Беларуснинг демократик кучлари етакчиси Светлана Тихановская билан Вильнюс шаҳрида учрашди.  Учрашувда санкция сиёсати ҳамда “Лукашенко ва унинг режими хизматчиларини Европа ва АҚШ билан ҳамкорликда жавобгарликка тортиш” масаласи муҳокама этилган.

Сўнгги вақтларда Лукашенко постсовет давлатлар шаънига тегувчи баёнотлар бергани маълум.

Жумладан, 2022 йилда у агар КХШТ йўқ бўлса, Қирғизистон, Тожикистон ҳамда Қозоғистонга ёмон бўлишини даъво қилганди.

2022 йил январь ойида Лукашенко Қозоғистонда нотинчликни келтириб чиқарган ташқи кучларнинг назари Ўзбекистонга ҳам қаратилгани ҳақидаги фаразни илгари сурган, бу иддао Ўзбекистонни КХШТ таркибига киритишга қаратилган таҳдид дея баҳоланган эди.

Ўшанда Лукашенконинг сўзларига Ўзбекистон президенти Шавкат Мирзиёев ҳам муносабат билдирганди.

Орадан бир ой ўтиб, россиялик пропагандачи Владимир Соловьёвга интервью берган Беларусь раҳбари бу гал Марказий Осиё давлатлари қатори Ўзбекистон ҳам собиқ Иттифоқ мамлакатларини ўз ичига олган сиёсий бирлашмага қўшилишини иддао қилган эди. “Батька”нинг бу баёноти Ўзбекистон  мустақиллиги ва давлатчилигига таҳдид сифатида кескин танқидга учраганди.

2024 йилда Лукашенконинг баҳсли фикрлари ортидан Қозоғистон ташқи ишлар вазири Беларуснинг Остонадаги элчисини “қизил гилам”га чақирганди.

Ўша йили Лукашенконинг беписанд баёнотидан дарғазаб бўлган арманистонлик фаоллар Беларуснинг Еревандаги элчихонасига картошка, тухум ва помидорларни улоқтирганди. Намойишчилар ҳукуматдан Беларусь билан дипломатик алоқаларни узиш ва мамлакатдан беларусь дипломатларини сургун қилишни ҳам талаб этганди.