АҚШ разведкаси Россия президенти Владимир Путиннинг тажовузкор яширин режасидан огоҳлантирмоқда.

Reuters агентлиги хабар беришича, Қўшма Штатлар жосуслик идораси Путин бутун Украинани ҳамда Европанинг бир пайтлар Совет Иттифоқи таркибида бўлган қисмини босиб олишни кўзлаган.

Айни пайтда Украина урушини тўхтатиш бўйича Россия билан музокара олиб бораётган АҚШ президенти Дональд Трамп маъмурияти Кремль ҳарбий тўқнашувга чек қўйиш ниятида эканини таъкидламоқда. АҚШ разведкаси огоҳлантириши эса жосуслик идораси хулосаси ҳамда сиёсий маъмурият баёнотлари ўртасида зиддият мавжудлигидан далолат беради.

Буюк Британия ҳамда Европанинг бошқа давлатлари махсус хизматлари ҳам Путиннинг «иштаҳаси карнай» эканидан хавотирда.

«Разведка маълумотлари ҳамиша Путин кўпроқ нарса хоҳлаётганига шоҳидлик берган. Европаликлар ҳам шундай деб ҳисоблашади. Жумладан, полякларнинг бунга ишончи комил. Болтиқ давлатлари эса ўзларини биринчи навбатда таҳдид остида деб билишади», – деган АҚШ Конгресси Вакиллар палатасининг разведка қўмитаси аъзоси Майк Куигли.

АҚШ миллий разведка идораси раҳбари Тулси Габбард эса Reuters агентлиги чоп этган мақолани «Трампнинг урушни якунлаш бўйича саъй-ҳаракатларини йўққа чиқаришга қаратилган ёлғон» деб атаган. Тулси Габбардга кўра, Россия Украинанинг тўлиқ босиб олиш ва Европага ҳужум қилиш имкониятига эга эмас.

2022 йил 24 февраль куни Украинага қарши босқин бошлаган Россия айни пайтда қуролли зиддиятни музокара йўли билан тўхтатиш ниятида эканини айтмоқда. Тинчлик музокаралари бошида турган Трамп маъмурияти Украинадан Россияга ҳудудий ён беришларни талаб қилаётгани айтилмоқда. Аммо Европа давлатлари ва Украина Россия тинчлик сулҳидан фойдаланиб, ҳарбий куч-қудратини оширишни кўзламоқда деб ҳисоблайди.

Россия президенти Владимир Путин ҳарб майдонида Украинани мағлуб этгудек бўлса, НАТОга қарши уруш очади, деб ҳисоблайди хавфсизлик бўйича Мюнхен халқаро конференцияси раҳбари Кристоф Ҳойсген.

«Путин бир неча бор Cовет Иттифоқининг парчаланиши ва руслар Россиядан четда қолиб кетганини XX асрнинг катта фожиаси деб атаган. Агар Путин Украинада мағлуб этилмаса, у Молдовага қадар ёки Болтиқ мамлакатларига қадар келишини кутишимиз керак», – деган Кристоф Ҳойсген.

Германия федерал разведка хизмати раҳбари Бруно Каль ҳам Ғарб давлатлари ўз мудофаа қобилиятини ошириш борасида қатъият кўрсатмаса, Москва НАТОга ҳужум қилади деб ҳисоблайди. Жосуслик идораси раҳбари фикрича, рус қўшинининг Украинадаги ғалабаси Путиннинг НАТО давлатларига ҳамласи эҳтимолини оширади.

Аввалроқ Америкадаги Урушни тадқиқ қилиш институти (ISW) Болтиқбўйи мамлакатлари Кремлнинг Украинадан кейинги нишони бўлади деган тахминни илгари сурган.

Жорий йил декабрь ойида бошида президент Путин Россия Европа давлатлари билан уруш қилиш ниятида эмаслиги, лекин Европа уруш бошласа, Россия бунга тайёр эканини айтди.

Олдинроқ Британия матбуоти ҳам Россия НАТО, хусусан, Европа давлатларининг хавфсизлигига таҳдид туғдирувчи, таъбир жоиз бўлса, уларнинг ўтакасини ёрувчи қалтис ҳаракатлар қилаётгани ҳақида ёзганди.